CEBU - Nagmalampuson ang Team Castrol-Quickflight Racing Team sa ilang pagpanulong didto sa Cotabato dihang mihakot kini og daghang dungog gikan sa duha ka managlahing kalihukan.
Sa 1st Gov. Susing Sacdalan Motocross Competition didto sa Amas, Cotabato, sila si Ted Conde ug Pepo Rubi miangkon sa unang duha ka dapit sa experts class, samtang si Kimboy Pineda mipahiluna sa ikatulong dapit.
Laing tulo ka Castrol-Quickflight riders mipakita sab sa ilang katakus aron haruson ang Executive-A division.
Si Ray Quirol misakmit sa unang dapit, si Atoy Belican miangkon sa ikaduha, samtang si Jun Enriquez maoy mi-okupar sa ikatulong puwesto.
Didto sa Polomolok, ang team captain sa Castrol-Quickflight nga si Pepo Rubi miposte og kaluhang kadaugan diin midaog kini isip labing kusog sa flat track competition ug sa motocross race.