Torneyo sa braa nagkanindot na

CEBU - Ang tulo pa lang ka buwan nga Banawa Riverside Athletic Association (BRAA) ubos sa pag-abag ni Lito “Sirlitz” Gillamac ug iyang pamilya, milusad sa 1st Inter-Sitio, Inter-Barangay and Inter-Clan basketball and volleyball tournaments didto sa Banawa open court (Gillamac lot) nga nakadani og 48 ka mga teams sa nagkalain-laing dibisyon.

Ang mga misalmot mao ang 18 ka teams sa Inter-Barangay, 10 ka teams sa Inter-Clan, 6 ka teams sa women’s volleyball, 8 ka teams sa midget ug 4 ka teams sa mini basketball.

Ang BRAA gipasiugdahan ni Boy Allan Lataza, kanhi collegiate varsity sa University of San Carlos (USC) Warrior ug sa University of the Visayas (UV) Green Lancer, nagkanayon nga ang torneyo sa basketball ug volleyball gihangop pag-ayo ug gipaluyohan sa mga molupyo sa sitio Banawa ilabi na gyud sa mga opisyales sa grupo nga sila si Poning Mirarza ang presidente, Medio Rocolas, vice-pressident; Divina Navaja, treasurer, Tata Lauron, sports coordinator, Lito Mabatid, head of peace and order, Robert Dolatre, technical head ug si Rey Cabajar, maintenance head.

Ang nahisgotang torneyo bag-o lang mitapos sa ilang elimination round diin upat ka teams ang pabiling wala pay pilde sa Inter-Barangay ug sa Inter-Sitio. Ang mga teams mao ang Kelly Perpas, AC Sports Parian, Loyola Guadalupe ug MECI Mktg; Calamba nga parehong nagbaton og 3-0 nga baraha.

Tulo ka teams ang walay pilde sa Inter-Clan nga naghupot og 5-2 nga baraha ug sila mao ang Lauron/Rocolas, Verano/ Navaja and Maloloy-on/Dinampo.

Sa women’s volleyball, bugtong ang Marimar lang ang wa’y pilde sa ilang 5-0 nga baraha. Ang laing mga teams nakatilaw na’g daug gawas lang sa 0-5 nga Diosa.

Ang Cinderall 3-2, Princess 3-2, Angels 2-3, ug Dyesebel 2-3 sa women’s volleyball.

Ang Dragons ug All Stars parehong may 2-1 nga baraha sa midget division samtang sa mini division, ang Kung Fu Kids adunay 3-0 ug ang Pokemon 0-3.

Si Lataza nagkanayon nga ilang giporma ang BRAA aron pagdiskubre sa katakos sa duwang basketball ug volleyball nga anaa manimuyo sa sitio Banawa alang sa panaghigalaay ug ingon man paghatag og kalingawan sa mga batan-on aron mahilikay sila sa sugal ug sa ginadiling druga.

Matud pa ni Lataza, mopili sila’g MVP, Mythical Five, Best Coach, Sportsmanship Team, Mr. Gentleman, Best Muse ug 3-Point King human sa torneyo. - BANAT