CMAC 'pasiugda karon og kickboxing
CEBU -Ang Cito Martial Arts Club-Pro Kwon Bub Association of Korea-Philippines sa abag sa Bamasko ni Sensei Maximino M. Tacay Jr. mopahigayon og PKB Standing Mixed Martial Arts nga ulohan og “Big Challenge 2” karong alas-11:00 sa buntag diha sa Canduman Sports Complex.
Magsangka sa main event mao sila si Adamson “D’ Assasin” Torbiso sa Durex Dragon KBC sa Lapu-Lapu City ug Leonard “The Energizer” Nicanor sa Black Scorpion KBC.
“Dili nako masulti nga ma knock-out nako siya. Pero akong paninguhaon nga ako ang modaog kay sige ko og praktis," matud pa ni Torbiso.
Apan gitubag sab kini ni Nicanor pinaagi sa pag-ingon: “Sa akong bahin, kabalo ko si Adamson beterano na sa kickboxing, ako bag-o pa. Daugon na lang nato sa ring. Ang Ginoo na lang ang mahibalo. Atong paninguhaon nga walay dautan nga mahitabo sa among away.”
Sa lain pang away, si Anecito “Dondon” Gesta sa CMAC-Mandaue makigpinatiray ni Renan “Limbas” Noblefranca sa Yaw-Yan ArDigma Cebu City.
"Dili ko gusto nga makapasakit og tawo, pero sa ring wala nakoy mabuhat. Dili ko mosaad nga sa unang round o ikaduha round ra, akong paninguhaon nga ma-knockout nako siya," matud ni Gesta.
Ang kickboxing event gipaluyohan sa barangay officials sa Canduman ubos sa liderato ni Brgy. Capt. Leo C. Jabas.
Alang sa dugang mga kasayoran kalabot sa “Big Challenge 2,” kontaka si Kru Cito Gesta sa 0928-9801333. - BANAT
- Latest
- Trending
