Cebu Niños nakauna

Nakaging sa makadiyot ang M. Lhuillier-Cebu Niños sa dihang gipabuthan kini og 7-0 run sa bisitang Batangas Lipa Barakos atol sa ilang engkuwentro kagahapon.

Apan ang gamhanang Cebu Niños ni sports patron Michel Lhuillier ug coach Raul 'Yayoy' Alcoseba daling nakarekober aron pagpulbos sa Lipa Barakos, 99-80 aron pagbaton og 1-0 nga bentaha sa ilang "best-of-five" semifinal series sa Liga Pilipinas National Playoffs kagabii didto sa Cebu Coliseum.

Ang 6-foot-6 center nga si Marlon Basco mibugha og 17 puntos uban ang 14 ka rebounds, tulo ka blocks ug duha ka assists sa 27 minutos niya nga pagduwa. Si Stephen Padilla miposa og tulo ka triples sa kinatibuk-an niyang 15 puntos ug si Jayford Rodriguez misansan og 12 puntos alang sa Cebu Niños, kinsa nagtinguhang molansang og 2-0 dihang ilang harungon pag-usab ang Lipa Barakos alang sa Game-2 karong alas-6:00 sa gabii.

Organisado kaayo ang Lipa Barakos pagsugod sa duwa diin mi-iskor kini sa unang siyete puntos sa duwa sud lang sa 23 segundos. Dali hinuon kining gitubag sa Cebu Niños pinaagi sa 6-0 nga rally nga nakapasikit sa duwa nga miresulta sa panagtabla sa makatulo ka higayon.

Katapusang nakalabaw ang Lipa Barakos sa iskor nga 18-17 kay ang Cebu Niños milusad og 25-7 run aron pag-inat sa labaw, 42-25 sa nahabiling 5:19 sa ikaduhang kuwarter.

Nalaslasan sa Barakos ang maong labaw ngadto sa nuybe puntos, 42-51, apan si Padilla mitapos sa first half pinaagi sa breakaway lay-up human makailog og bola ug gisugdan ang Cebu Niños ang third quarter pinaagi sa 6-0 run aron pagbalik sa double-digits nga labaw.

Ang Cebu Niños maoy nidominar sa tanang departamento sa duwa. Ilang gilupig sa nilayatay ang Lipa Barakos, 47-38 ug mi-iskor og 27 puntos gikan sa 19 ka turnovers sa ilang kontra. Ang Cebu Niños mao sab ang nag-una sa assists, 19-12 ug ingon man sa blocks, 10-3.

Si Bonbon Custodio maoy nangulo sa pilderong Lipa Barakos pinaagi sa iyang 18 puntos. Gisundan ni Jeff Sanders kinsa miabuno og 14 puntos ug si Jay-R Estrada nga miani og 12 puntos.

Cebu (99) -- Basco 17, Padilla 15, Rodriguez 12, Ababon 8, Berame 8, Enriquez 7, Tangkay 6, Mepaña 6, Dacia 5, Bucao 4, Saladaga 4, Capati 2, Cavan 2

Batangas (80) -- Custodio 18, Sanders 14, Estrada 12, Lim 7, Moody 5, Junio 5, Camaso 4, David 4, De Cast3o 4, Neo 3, Alfad 2, Habit 2