Panthers gipanitan sa MCA

Naapil na ang Mabolo Christian Academy (MCA) uban sa MLSDF, Remember ug ACES sa tapok sa mga mananaog dihang ilang gi-ihaw ang University of Southern Philippines Foundation (USPF) Baby Panthers, 69-60 sa nagpadayong aksiyon sa 6th M. Lhuillier Kwarta Padala Under-21 Developmental Basketball League didto sa Consolacion Sports Complex.

Mibahog dayon ang MCA cagers pagsugod sa duwa aron pagposte og 15 puntos nga labaw, 26-11 paghuman sa unang kuwarter.

Ang Baby Panthers ni coach Camilo Go, mi-rally sa ikaduhang kuwarter aron pagkitkit sa labaw ngadto na lang sa usa ka punto, 34-33 sa first half ug gani ila pa nga nailog ang momentum aron pagbaton og uno punto nga labaw, 48-47 paghuman sa third quarter.

Misamot kahugot ang duwa sa final quarter diin ang duha ka kampo nag-iyahay lang og palabwanay diin ang Baby Panthers pabiling naglabaw og uno punto, 60-59 sa katapusang singko minutos sa duwa.

Apan sa wala damha, nalubag sa MCA ang duwa  human  sa ilang 10-0 run aron pagdimdim sa tam-is nga kadaugan.

Ang kampiyon sa maong kompetisyon nga gipasiugdahan sa M. Lhuillier Sports Development Foundation mobulsa og P5,000, ang second placer makadawat og P3,000 ug ang third placer makaangkon og P2,000.

Hinuon, ang nahisgutang mga ganti idonar ngadto sa mga charitable institutions.