Niños mohamag karon sa Stallions

Paningkamotan sa top-seeded M. Lhuillier-Cebu Niños nga  makasulod sa semifinal round sa Smart Liga Pilipinas National Playoffs sa dihang ilang sulngon karong adlawa ang host Trace-Laguna Stallions sa Game-3 sa ilang "best-of-five" quarterfinal series didto sa Trace College Gym sa Los Baños, Laguna.

 Ang Cebu Niños ni sports patron Michel Lhuillier ug coach Raul ‘Yayoy’ Alcoseba midaog sa unang duha ka serye niadtong miaging semana diha sa Cebu Coliseum.

Ang pagkulit og daog maoy tumong karon sa Stallions ni Erwin Genuino ug coach Nomar Isla. Kun molampos ang Stallions, ang Game-4 duwaon ugma didto gihapon sa Laguna. Ang Game-5 kun kinahanglanon anhi   duwaon sa Sugbu karong Agosto 31.

Ang MVP sa liga nga si Marlon Basco ug sila si Bruce Dacia, Stephen Padilla ug ang bag-ong nakuha nga si Ronald Bucao  mao karon ang sandigan sa Cebu Niños.

Sa laing bahin, ang Stallions magsalig sab ni Laguna leg MVP Jerwin Gaco, Nat Cruz, Abby Santos ug team captain Ricky Ricafuerte.

Didto sa Lipa City Youth and Cultural Center, ang fifth-seed Lipa-Batangas Barakos mopahayag sa ilang kampanya sa semifinals sa ilang pag-host sa fourth seed Smart-Pampanga Buddies sa Game-3 sa ilang kaugalingon “best-of-five” series. Ang duha nagtabla karon sa serye, 1-1.

Ang Barakos ni coach  Roger Sia mipakaging sa Buddies sa Game-1, 91-85 niadtong Agosto 20 didto sa University of the Assumption. Apan ang  Buddies ni coach Aric del Rosario nakabawi sa Game-2 pinaagi sa paglubong sa Barakos, 98-73 aron pagtabla sa serye.