Domingo-Vorapin mag-abot sa Sept. 14 sa Cebu Coliseum

Gipahibalo ni Sammy Gello-ani sa SGG Sports Promotions nga si World Boxing Organization (WBO) Oriental bantamweight champion Michael Domingo manalipod sa iyang titulo batok ni kanhi world champion ug  beteranong Thai campaigner Ratanachai Sor Vorapin karong Septiyembre 14 diha sa  Cebu Coliseum.

Ang 28-anyos ug pambato sa ALA Gym nga si Domingo (36-14-2, 15KOs) midaog sa iyang regional title pinaagi sa second round KO batok ni Rivo Rengkung sa Indonesia niadtong Hulyo 26 diha gihapon sa  Cebu Coliseum.

Si Domingo sayong mipakita og tilimad-on dihang midaog kini batok sa kanhi way pilde Mexican prospect Miguel Roman atol sa Philippines vs. Mexico World Cup niadtong Agosto 11, 2007 didto sa Sacramento, California.

Sa iyang bahin, ang 31-anyos nga si  Vorapin (73-10-0, 49KOs) misakmit sa WBO bantamweight title gikan ni Cruz Carbajal sa Mexico niadtong 2004 ug malampuson kining nakadepensa sa iyang korona batok ni Maurico Martinez sa Panama sa tuig 2005, apan nahuboan kini sa iyang bakus human mapilde ni Jhonny Gonzales sa Mexico atol sa Mexico-Thailand World  Cup niadtong Oktubre 29, 2005 didto sa Desert Diamond Casino sa Tucson, Arizona.

Si Vorapin katapusang miaway batok ni WBO bantamweight title holder Gerry Peñalosa niadtong Abril didto sa Araneta Coliseum diin si Vorapin napilde pinaagi sa TKO sa 8th round.

Ang Domingo-Vorapin match nga giulohan og "Daytime Boxing, Philippines vs. Thailand" ug hiniusang gipasiugdahan sa SSG Promotions ug Kokiet Group sa Thailand, sugdan sa alas-9:00 sa buntag ug makita kini live ngadto sa Thailand, Vietnam, Korea ug Cambodia.