La Purisima Concepcion milumpag sa Lomar
Nahimong yawe sa kadaugan sa LPC si Carlos “Ador” Lucero dihang gibaswat niini ang makabungog nga 26 puntos hinungdan sa pagkalumpag sa bandera sa Lomar sa iskor 78-75 atol sa ilang mainitong engkwentro sa nagpadayong T – Padilla First Basketball Tournament 2008 didto sa Barangay T – Padilla Kiwanes Sports Complex, ning siyudad.
Sa unang kuwarter giladlad dayon sa LPC ang nagpungasi nilang depensa hinungdan nga nabiyaan ang Lomar og syete puntos sa iskor 25-18 samtang sa ikaduhang kuwarter mitunol ang star player sa Lomar nga si Jerame Ingente og 13 puntos nga maoy mikitkit sa labaw sa LPC hinungdan nga sila na ang midominar ug miabante’g singko puntos nga labaw sa iskor 38-33 pagkahuman sa first half.
Dihang nahuptan na sa Lomar ang momentum sa duwa, hilom usab nga nanginhas og mga puntos ang LPC ug nailog niini pagbalik ang bentaha nga gisapwang sa Lomar sa ikaduhang kuwarter. Niining higayona, ang LPC na usab ang mitipig sa dos puntos nga labaw sa iskor 54-52.
Nahimong kulbahinam ang katapusang kuwarter dihang miratsada ang duha ka grupo ug nagsinukliay kini og mga puntos.
Si Lucero ang nangulo sa kadaugan sa LPC kinsa mibulsa og 26 puntos ug uban sa abag ni Disney Ferraren sa iyang 18 puntos samtang nahimong haligi sa Lomar si Ingente kinsa mihakot og 23 puntos ug 11 puntos nga giamot ni six-footer Hans Cabrera.
Ang T – Padilla First Basketball Tournament 2008 gipasiugdahan sa Sangguniang Kabataan (SK) Council pinanguluhan ni Hon. Jason Rosafa ug sa abag ni Bgry. Capt. Michael Ralota.
Puntos Matag
LPC (78) Lucero 26, D. Ferraren 18, Cabrera 10, Ang 6, Compra 6, Guinita 4, Amahan 4, Arogancia 2, Managbanag 2.
LOMAR (75) J, Ingente 23, Ledesma 11, H. Cabrera 11, Manal 8, M. Cabrera 6, Gimeno 6, Natural 6, Genson 4.
Quarterscores
25-18, 33-38, 54-52, 78-75
- Latest
- Trending
