1st Masskara billiards fest

Nadasig gumikan sa dakung kalamposan nga naani sa Negros Oriental International 9-Ball Championships nga gipahigayon sa Dumaguete City niadtong miaging tuig, may lain na usab nga world class poolfest nga gitakdang ipahigayon sa Negros sa bulan sa Oktubre ning tuiga.

Dili hinuon sa Dumaguete ipahigayon ang umaabot nga dakung torneyo sa billiard kondili sa Bacolod City, Negros Occidental. Ang dakbayan sa Bacolod maoy mo-host sa First International Masskara Billiards Festival nga ipahigayon sa umaabot nga Oktubre 8-12, 2008.

Ang nahisgutang Masskara Billiards Fest maoy usa sa labing dakung billiard tournament nga mahitabo sa Pilipinas ning tuiga. Ipahigayon kini sa Garden Royal Function Hall sa Goldenfields Commercial Complex sa Bacolod City.

Ang maong torneyo gi-promote sa  Global Entertainment Marketing Services Corporation, gipasiugdahan sa City of Bacolod League Cities of the Philippines ug giabagan sa pag-organisar sa Negros Billiards Stable, Puyat Sports, Bugsy Promotions ug sa Billiard Managers and Players Association of the Philippines.

Ang 1st Masskara Billiard Festival mitanyag og premyo nga dili mokubos sa $84,200 alang sa palarang mga mananaog. Gipaabot sa mga tigpasiugda nga mas daghang mga bilyarista ang mosalmot sa torneyo ug magmalampuson sab kini sama sa ubang billiard tournament nga gipasiugdahan.

Gikan sa $84,200 nga katibuk-ang premyo, ang mogulang kampiyon sa torneyo mobulsa sa "lion's share" nga mokabat sa $30,000 ug ang first runner-up makahipos og $15,000.

Gipaabot nga mosalmot sa torneyo sila si Efren 'Bata' Reyes, Francisco 'Django' Bustamante, Alex 'The Lion' Pagulayan, Dennis 'Robocop' Orcullo, Ronato 'Volcano' Alcano, Lee Van 'The Slayer' Corteza, Ramil 'Bebeng' Gallego, Warren 'Warrior' Kiamco, Roberto 'Pinoy Superman' Gomez, Ricky 'Bai' Zerna, Joven 'The Shark' Bustamante, Gandy 'Sapsal' Valle ug Antonio 'Nickoy' Lining.

Duna say ipahigayon nga first 9-ball amateur tournament nga giulohan og Inter-City National Amateur Billiards Tournament nga gitakda sa Oktubre 4-7.

* * *

(Mga sugyot ug pakisayod? Text sa 0910-8105522)