Nakalingkawas ang defending champion B-Meg ‘85 sa makutas nga hagit sa Heartvit ‘86 pinaagi sa paglansang og 66-60 nga kadaugan sa 2008 San Carlos Boys High Alumni Basketball Association (SCBHABA) season didto sa University of San Carlos (USC)-North Campus Gym.
Si Lou Regidor, ang kanhi pro ug commercial star sayong nakahaling og mga puntos aron hatagan ang B-Meg og singko puntos, 20-15 paghuman sa first quarter.
Luyo sa paningkamot ug sa mainitong duwa ni Arturo Pepito Mata nakabangon ang Heartvit ug nakatabla pa kini, 34-all sa first half.
Apan didto ra kutob ang ilang paningkamot kay ang B-Meg mipalusad og laing rally aron pag-abante og kuwatro puntos, 52-48 sa katapusang 10 minutos sa duwa.
Si Regidor, kinsa mipabuto og 28 puntos maoy topscorer sa B-Meg, samtang si Mata nga adunay 26 puntos mao sab ang nangulo sa habig sa Heartvit.
Puntos matag usa
B-MEG (66) - Regidor 28, Torrejos 7, Ramos 7, Monsanto 7, Sepe 7, Aznar 6, Bacaltos 4
HEARTVIT (60) - Mata 26, Romarate 14, Amores 8, Villamor 4, Avila 3, Congson 2, Matugas 2