Atan Guardo naanghelan pa

Kalit nga nahanaw ang tumang kalipay sa Bakante human masulod ang marka  bahala nga itsa ni Neil Avila gikan sa midcourt ug dayong kahurot sa oras aron pangulohan ang Atan Guardo ngadto sa kadaugan, 67-65 sa Yati, Liloan SK Cup basketball tournament didto sa Liloan KAI Sports Complex.

Miulbo dayon ang kainit sa Bakante pagsugod sa duwa   diin miposte kini og 10 puntos nga bentaha sa iskor nga 22-12, apan ang Atan Guardo mihinayhinay og kitkit sa labaw hangtod na  sa nanghinapos nga bahin sa duwa.

Milabaw lang og uno punto, 65-64 sa nahabiling kuwatro segundos sa duwa, ang Bakante makahimo pa unta pag-inat sa ilang labaw, apan si Barquio misipyat sa iyang free throws ug nailog ni Bugtai ang bola dayon pasa ngadto ni Avila kinsa alisto kaayong mibuhi sa bola sa midcourt ug sa wala damha hanoy kaayo nga nasulod ang bola sa ring  hinungdan nga  nakaambak sa kalipay ang kampo sa Atan Guardo.

Mao kadto ang ikalimang puntos ni Avila sa maong duwa.

Si Bugtai maoy topscorer sa Atan Guardo nga mirehistro og game-high 20 puntos.

Ang Atan Guardo gipaluyohan sa Uniherb Philippines, ang tiggama og food supplements sama sa Arthro, Heartvit, Diabet ug Kidneycare.

Puntos Matag Usa

Atan Guardo (67) - Bugtai 20, Mina 17, Bacalso 11, Avila 5, Soon 2, Mag-asin 2, Ebao 2, Jarocan 2, Selecio 2, Santillan 2

Bakante (65) - Puerto 19, Maglasang 10, Cajes 10, Barquio 8, Comendador 6, Antipuesto 6, Tabuso 4