Banal maglisud ni Concepcion?

Nangagpas og usa ka malisud nga away si ALA Boxing Gym star AJ 'Bazooka' Banal (17-0-1, 14KOs)  batok ni Panamian Rafael 'El Torito' Concepcion (10-2-1, 6KOs) sa ilang 12 ka hugna nga kumbati alang sa bakanteng World Boxing Association (WBA) super flyweight title nga maoy main event sa gikahinaman nga "Laban na Banal! Panahon Na" card karong Hulyo 26 diha sa Cebu Coliseum.

“Nakakita ko sa iyang away sa video og makasulti ko nga lig-on gyud siya. Kusgan kaayo ug adto ra magdaog ani sa abilidad,” matud pa ni Banal atol sa press conference kagahapon didto sa Chika-an Restaurant sa Salinas Drive, Brgy. Lahug.

Si Banal  wala hinuon mosulti kun iya ba nga pakamangon  si Concepcion, apan nanganti kini nga kun adunay higayon iya kining buhaton.

"Sayo pa kaayo isulti kong ako ba siyang ma-knockout. Pero nahibaw ko nga part na sa game so kun dunay higayon,  ako nang buhaton aron sayo mahuman ang away," dugang pa ni Banal, nga nangambisyon nga mamahimong ikatulo nga Pinoy'ng boksidor sunod nilang Morris East ug Ben Villaflor nga nahimong world champion sa edad nga 19 anyos.

Sa eksplosibong supporting main event, laing  garbo sa ALA Stable nga si Milan Melindo (15-0, 4KOs) ang makighamag batok ni Carlos Bolivar Melo (18-6, 2KOs) nga taga Panama  sab alang sa WBA Intercontinental minimumweight title.

Duha ka special bouts ang gihan-ay aron paglingaw og maayo sa mga tawo ning maong binukbukay nga gipasiugdahan sa ALA Promotions  inabagan sa ABS-CBN Sports, Golden Boy Promotions ni boxing great Oscar de la Hoya, Cebu City Government ubos sa liderato ni Mayor Tomas Osmeña  ug sa Waterfront-Cebu City Hotel and Casino.

 Si WBA president Gilberto Mendoza makigsangka ni kanhi Philippine champion Ernie Alesna sa tulo ka hugna nga exhibition bout, samtang si Brenda Shaylor, usa ka babaye nga boksidor gikan sa Las Vegas, Nevada, makiglayog  batok  ni Reynalyn Consejo Jacob nga taga dakbayan sa Bacolod.

Sa iyang bahin, ang bag-ong sulbong nga ALA Boy nga si James Bacon makighamag og langyaw nga kaatbang sa labing unang higayon. Harungon ni Bacon si  Chaiyong Sakkreerin sa Thailand.

Lain pang mobanat mao sila si Rocky Fuentes  batok ni Roldan Malinao, Robert  Allanic batok ni  Leonardo Doronio, ug Hilario Canillas  batok ni Ramil Cabalan.

 Sa laing bahin, si ALA Promotions president Michael P. Aldeguer mibutyag nga ilang imbitahon si Pinoy ring superstar Manny Pacquiao aron motambong sa maong promosyon.