CHEDA-A misakmit sa korona

Nakalingkawas  ang  Cebu City Hall Employees Darts Association (CHEDA)-A sa ilang kulbahinam nga kampiyonato batok sa Tom 80 sa iskor nga  9-8 aron pagsakmit sa four-man team title sa 6th Mayor Tomas Osmeña Inter-barangay Summer League Darts Tournament didto sa Baseline Sports and Recreation Center.

Ang CHEDA gibitoonan sa ilang team manager  nga si Bert Colong Jr., Roy Laude, William Encorporado, Yoko Quilope ug Jomar Amerol  nakakapyot pa og  igo lang midaog og uno punto batok sa Tom 80 nilang Raymond Solas, Roger Dequit, Dino Bacayo, Blu Boy Manlunas ug Tom Benuesa.

Si Quilope maoy nahimong bida sa CHEDA  human kini midaog sa katapusang sangka sa double 16.

Ang Lola Eats-Guadalupe nilang Dick Ramirez, Odong Pamatian, Esteban Montenegro ug Allan Velos mi-okupar sa ikatulong dapit, samtang ang CHEDA Team-B nilang Dario Potot, Lando Cadorna, Wyno Ugang, Angelito Badayos ug Wennie Ocañada mipahiluna sa ikaupat.

Sa laing bahin, ang tandem nilang Jovy Pepito sa San Nicolas ug Esteban ‘Steve’ Montenegro sa Capitol Site maoy labing hawod sa 42 ka mga entrante sa open-youth  doubles.

Sila si Pepito ug Montenegro kinsa nakabaton og “twice-to-beat” incentives milansang og 5-3 nga kadaugan batok nilang Andrew Besin sa San Nicolas ug Wennie Ocañada sa Inayawan sa finals.

Ang tandem nilang Christopher  Daclan sa Pardo ug Junex Perez sa Mabolo miloblob sa ikatulo, samtang sila si Julius Antonio sa Kamputhaw ug Wyno Ugang sa Zapatera maoy mikapyot sa ikaupat nga dapit.

Ang mga mananaog pasidunggan atol sa awarding ceremony nga pagatambongan ni Cebu City Councilor Sylvan ‘Jack’ Jakosalem karong Sabado sa alas-8:00 sa gabii diha sa Baseline Restaurant.