Wala na makabangon ang San Nicolas Proper human kini gimudmud sa Bulacao Pardo, kinsa midaog sa iskor nga 66-57 sa nagpadayong aksiyon sa second round sa Osmeña Cup Inter-Barangay Basketball league seniors division didto sa Quiot Pardo Sports Center .
Ang duha ka team mipakita sa ilang lig-on nga depensa hinungdan nga walay sayon nga mga puntos ang napasud sa matag team. Tungod sa kasikit sa duwa, natapos ang unang kuwarter sa iskor nga 14-13 pabor sa Bulacao.
Si Marcel Gonzales mao lang ang bugtong player sa Bulacao nga nakapakita og nindot nga opensa. Si Gonzales miduslit og 10 sa ikaduhang kuwarter alang sa iyang kinatibuk-ang 19 puntos.
Wala sab hinuon magpa-alkanse ang San Nicolas Proper dihang ang ilang sinaligan nga si Fred Aruado mipabuto og otso puntos sa ikaduhang kuwarter nga nakapukaw sa nahikatulog nga San Nicolas Proper. Apan dili kini igo aron maangkon nila ang labaw kay miarangkada man sab ang Bulacao aron pag-angkon og kuwatro puntos nga bentaha sa first half sa iskor nga 26-22.
Ang Bulacao mihimo og kausaban sa ilang depensa sa third quarter ug igo lang gipa-iskor ang San Nicolas Proper og 10 puntos sulod sa unom ka minutos.
Niadtong tungora, naglisod na ang San Nicolas Proper pagpasud sa ilang opensa kini tungod usab sa grabeng depensa nga gipatuman sa Bulacao.
Mao kini ang ikaduhang daog sa Bulacao sa pagsugod sa second round sa maong liga.
Puntos matag usa
BULACAO (66) -- Gonzales 19, Apa 8, Prescillas 6, Enriquez 5, Dayanan 4
SAN NICOLAS PROPER (57) -- Aruado 12, Agpasa 8, Sari 8, Maurillo 6, Sianson 2
Quarterscore:
14-13, 26-22, 40-32, 66-57