Tulo ka teams gikan sa Sugbu ang misubay og managlahing dalan sa Dapitan City Beach Volleyball Championships didto sa Dapitan Beach Front Hotel sa Dapitan City, Zamboanga del Norte.
Usa ka team nag-una sa ilang bracket, ang laing team wala pay kasiguroan kun makalahutay, samtang ang ikatulo hingpit na nga natagak sa kompetisyon.
Sila si Florian Gutierrez ug Jusabelle Brillo maoy nag-una sa Bracket A bitbit ang 2-0 win-loss card.
Ang duha miabli sa ilang kampanya pinaagi sa 21-12 nga kadaugan batok sa team gikan sa Dapitan City Volleyball Association (DACIVA). Nasundan ang ilang kadaugan dihang ilang gipilde ang University of St. La Salles sa Bacolod, 21-11.
Sa pagsulat niini, ang laing koponan gikan sa Sugbu nga gibitoonan nilang Marites Natad ug Erika Verano, kinsa mirepresentar sa Heartvit ang natanggong sa Dumaguete City tungod sa bagyong si Frank. Gihatagan lamang sila hangtod sa alas-2:00 sa hapon kagahapon aron makaapil pa sa maong torneyo.
Sa laing bahin, ang inilog ug title favorites Southwestern University ni Danika Gendrauli ug Lorimae Layno napakyas pagsulod sa semifinal human kini mihipos og 1-2 nga baraha.
Sila si Gendrauli ug Layno nagsuka-suka sa barko nga ilang gisakyan paingon sa Dapitan human ang bagyong si Frank mikusokuso og maayo sa kadagatan.
Bisan pa sa ilang nahiagoman, sila si Gendrauli ug Layno nakahimo gihapon pagpukan sa Foundation University of Dumaguete, 21-18 sa ilang unang duwa.
Mao kadto ang ilang bugtong daog. Sa sunod nilang duha ka duwa miyukbo sila sa Negros nilang Kay Aplas ug April Hingpit, 21-17 ug dayon sa Angeles Law Office sa Dapitan, 21-19.