Cebu Lite batok Unilink sa Vic Enterprises finals

Makabungog nga panimawos ang gipahamtang sa Cebu Lite Trading ni playing coach Dr. Boy Te ngadto sa Golden Lines Shipping pinaagi sa pag-iskor og 85-60 nga kadaugan aron pag-abante sa finals sa Vic Enterprises 2008 Invitational Cup didto sa CEC gym sa dalan Dimasalang ning dakbayan.

Ang unang luna sa finals gilansang sa Unilink Shipping kinsa naka-ipsot batok sa 100 Plus Isotonic Drink, 82-79.
Busa, ang Cebu Lite ug Unilink mag-ilog sa korona karong umaabot Domingo samtang mag-ilog sa third place ang Golden Lines batok sa 100 Plus.

“It was a statement game. We proved that our previous loss was a fluke,”  matod pa ni Te kinsang team midaug ug 25 puntos ug nanimawos sa ilang 63-61 nga kapildehan batok sa Golden Lines atol sa elimination round.

Nag-agi una og 30 minutos nga kalangay human sa first period diin naglabaw ang Cebu Lite, 18-14 tungod kay buot ni Te nga paduwaon ang beteranong si Rey Maraño apan mi-protesta ang Golden Lines.
Midaug ang Golden Lines sa protesta apan pilde sa duwa. Hugot nga gibarugan sa Golden Lines nga dili mahimong makaduwa si Maraño kay supak sa ilang balaud nga moduwa ang player nga nakahimo’g upat ka absent.

Na-usab ang baruganan ni Te ug misugot nga dili moduwa si Maraño ug diha nakapangagho si coach Te nga dili na nila kinahanglanon si Maraño bisan pa sa finals.

Pagsugod pa lang gani sa second period, daan nang hibaw-an nga mapungtanong gilubong sa Cebu Lite ang Golden Lines ug gitapos ang halftime sa 48-27 nga abante. Wala na kini matandog hangtod sa third ug fourth period ug gani mi-abot pa sa 20 puntos ang biya sa Golden Lines, 80-60 sa naghinapos nga bahin sa fourth period.

Si Jared Magdales maoy nangu sa Cebu Lite sa iyang 17 puntos gisundan ni Joselito Ocampo sa iyang 13 puntos ug kang Lito Navarro 12 puntos.

Si Aris Jayme mi-iskor og 13 puntos alang sa Golden Lines. 

Earlier, Paul Gabatan paced Unilink with 24 points samtang sa habig sa 100 Plus, si Winston Estorba mikamada og 25 puntos.

First Game:

Unilink (82) – P. Gabatan 24, Baclay 16, Narvasa 8, Datan 8, Yap 7, Doblas 6, Grogard 5, J. Gabatan 4, Trinidad 2, Cabiluna 2

100 Plus (79) –  Estorba 23, F. Estorba 15, Mendoza 15, Luces 13, Nadera 8

Second Game:

Cebu Lite (85) – Magdales 17, Ocampo 13, Navarro 12, Reyes 9, Sasing 9, Noel 9, F. Te 7, Labilles 4, Esma 3, Mauro 2

Golden lines (60)  –  Jayme 13, Lim 10, Armenion 8, Cenabre 7, Cabaltera 7, Uy 6, Gabrinez 4, Abellon 3, Suico 2 Halftime: 48-27.