Sultada

Taas-taas na nga wala ko makapaambit sa sultada ning akong lindog apan dili ko kawangon ang higayon kay hisgutan nako ang  usa ka handler o tigpakondisyon sa manok. Sagad sa usa ka handler mosunod ra gyud sa unsay mando sa tag-iya kay mao man lagi ang gahatag sa suweldo, apan dili tanang tag-iya nagsuweldo sa handler kay ang uban magbase lang kun sa manok nga nakabuno.

Dinhing bahina alaut ang usa ka handler apan masabtan usab nato ang habig sa tag-iya kay sagad mohimo niini nga kasabotan kadtong dili kaayo adunahan nga makahatag gayod sa saktong suhol sa usa ka handler. Mao nga magbasi sila sa nakabuno nga manok, apan huna-hunaon nato ang kahago sa usa ka handler kun ang iyang kahago ato usab iapil sa sugal sa sultada, walay suwerte kun mapildi kay wala siya’y maani.

* * *

Alang sa uban nga handler mosugot lang sa ingon niini nga kasabotan kay kalipay nila ang paggalam og manok itatari. Daghan ko’g kaila nga handlers sa gagmay lang nga manokan nga mopagawas sa ilang gibati kun mapiit na niini nga klase sa sabot, dili man gud sa tanang higayon sakto ang agalon ug para nako mas nakahibalo ang handler sa kondisyon sa manok kay sa tag-iya. Adunay tag-iya nga gusto moapil sa sultada nga duol na lang ang adlaw sa fight.

Alang sa tag-iya pasuwerte, apan alang sa handler alkanse kaayo sa iyang kahago lisud kaayo ang pasuwerte, bisan pa gani siyento porsiyento ang pagsalig nimo nga modaog, mapildi pa man gani, unsa pa kaha ang pa suwerte. Atong huna-hunaon nga ang handler naningkamot usab nga modaog ang iyang manok nga gikondisyon gawas matanyag ang iyang ngalan sa sultada, ang ganti  nga iyang madawat mapahimuslan sa iyang pamilya.

* * *

Dili tiaw ang pagpa-kondisyon sa manok gikan sa pagsubang hangtod na sa pagsawop sa hayag sa adlaw. Uban gani magpalihug sa gabii aron maanad ang manok sa suga ug mao kini gitawag og lighting para dili matumbalingaw ang manok.

Panahon sa gabii nga sultada, kun ugaling nakuha ka og handler sutada ang kapasidad niini ug salig sa iyang pagkondisyon sa manok. Kun moingon dili madala ang manok nga iapil sa sultada sa maong panahon o adlaw kinahanglan nga atong paminawon aron dili ta magpabasol.

Timan-i,  ang handler maoy labaw nga nasayod sa kondisyon sa lawas sa manok alang sa sultada. Hatagan ta sila sa ilang sakto nga panlantaw sa manok alang sa sultada kay ila usab nga gihagoan ang pagkondisyon sa manok aron modaog.

* * *

Lahi nga matang sa derby ang ipahigayon sa Gallera de Mandaue karong Sabado. Four-cocks kini ug ang paspas nga mopukan sa kaatbang makadawat og P10 mil nga premyo ug ang ikaduha mobulsa og P5 mil.  Ang modaog makadawat og P200,000 nga premyo ug aduna kini pot money nga P4,400. 

MANOK DEBUYNAS

    Balhibo      : BALAO

   Color sa tiil : YELLOW

Mga pangutana ug suhistiyon:  Text sa 0919-2988988 o e-mail:  [email protected].