Largo, laing lima nakasud sa semis

Nakasulod sa semifinal round si Palarong Pambansa gold medalist Francis Largo human sa iyang kadaugan batok ni Leandro Fernandez sa 2008 Milo Age-Group Tennis Championships Cebu leg didto sa Villa Aurora tennis courts sa barangay Mabolo, ning siyudad.

Si Largo, ang topseed ning maong torneyo mipalagpot ni  Fernandez, 8-3 sa boys 18-under quarterfinals.

Sunod harunong ni Largo mao si Amiel Aya-ay, kinsa nakasulod sab sa semis pinaagi sa  iyang 8-4 nga kadaugan batok ni Raymart Juliani.

Sa boys 16-under, ang managsuong Princeton ug Kurt Gerapusco miugkat sab og daog batok sa managlahing kaatbang ug ingon man sila si Paulo Cenabre, Jayvee Canoy, Amiel Aya-ay ug Christian John Cabahug.

Gipukan ni Princeton si John Marc Palumag, 6-0,  6-2, samtang ang iyang manghod nga si Kurt midaog batok ni Leonel Hilig, 8-4.

Misimang ang  tagsa-tagsa ka  dalan  sa  kaluhang  Christian John ug Christian Paul Cabahug. Si Christian John midaog batok ni Kristoff Carmona, 8-2, apan si Christian Paul naparot ngadto ni Aya-ay,  5-7, 3-6.

Sa iyang bahin, si Canoy mibihag ni Paul Abendan, 6-2, 6-3, samtang si  Cenabre milampurnas ni Ian Quirubin, 8-5.

Didto sa Cebu Country Club,   upat ka female netters ang way hago nga misulod  sa  semifinal round  dihang mi-atras ang ubang mga magduduwa.

Nakasulod sa semis mao sila  si Clarrisa Mae Fuentes, Jesamil Singson, Irish Joy Balverde ug Samantha Baylosis.

Sa lain pang aksiyon,  lain sab nga Palarong Pambansa gold medalist nga si Rtiz Satera mimakmak ni Ivan Casanillo, 8-1 aron pag-abante sa boys 14-under quarterfinals.

Uban ni Satera sa sunod nga hugna mao sila si Clyde Dale Bienes, Francis Parangan, Amiel Jay Torion, Mark Jason Chan, Dan Eldric Cinco ug Kim Ayuda.

Sa 10-under category, sila si Christopher Encarnacion ug Jayson Lauron nakasulod sa final eight.