Coke Zero sud quarterfinals sa PPSA-Barangay Cup 2008

Mipasilong na sa quarterfinals ang Coke Zero ni Allan Lim human gipilde ang SIG, 87-84 sa Punta Princesa Sports Association (PPSA)-Barangay Cup 2008 basketball tournament didto sa Vicente Sotto Memorial Gym sa Brgy. Punta Princesa, ning siyudad.

Si Roberto Abasolo mipasulod og 12 sa iyang 25  puntos sa unang kuwarter alang sa nag-uros-uros nga Coke Zero. Gawas sa iyang puntos, si  Abasolo milangkat sab og 10 ka rebounds ug lima ka assists.

Hinuon, ang SIG nakatabla sa makaduha ka higayon sa second period luyo sa paningkamot nilang Edward Solon, Bogs Rivo ug Jerry Acapulco.

Ang SIG milusad og 26-17 rally sa katapusang kuwarter, apan wala kini makalahutay kay ang Coke Zero mi-iskor sa katapusang otso puntos kortesiya nilang Lito Navarro ug Allan Lim.

Si Navarro mitapos sa duwa bitbit ang 15 puntos, samtang sila si Lim ug Marlou Monreal mipupo og 10 puntos matag usa alang sa Coke Zero nga nagbitbit og 6-2 win-loss record.

Sila si  Solon ug Rivo miposa og 17 puntos matag usa alang sa SIG, samtang si Acapulco miamot og 16 puntos. 

Puntos matag usa

Coke (87) – Abasolo 25, Navarro 15, Lim 10, Monreal 10, Legaria 8, Gallardo 5, Tecson 4, Cabasan 4, Bacarias 2, Sullano 2, Oropeza 2

SIG (84) – Solon 17, B. Rivo 17, Acapulco 16, Montilaa 14, Petallar 10, Malinao 8, O. Rivo 2