Nagkinahanglan pa og duha ka overtime ang Bayabas una nila maangkon sa hingpit ang 74-73 nga kadaugan batok sa El Popular sa nagpadayong Zapatera Summer League 2008 niadtong miaging adlaw didto sa Barangay Zapatera, ning siyudad.
Ang Bayabas maoy unang miladlad sa ilang mga opensiba ug nakabentaha kini og dos puntos, 13-11 sa unang kuwarter.
Ang El Popular mibawos sa sunod nga kuwarter pinaagi sa pagpatuasik sa ilang mga opensiba ug ingon man pagpatuman sa ilang hugot nga depensa aron pag-ilog sa labaw, 28-25 paghuman sa maong kuwarter. Sa kainit sa opensiba sa El Popular, misaka pa ang ilang labaw ngadto na sa otso puntos, 51-43 sa ikatulong kuwarter.
Sa katapusang kuwarter, ang Bayabas mikalingaw og kitkit sa labaw hangtod nga nakatabla sa iskor, 59-59 nga miresulta sa overtime.
Atol sa dugang singko minutos, nahimong kulbahinam ang duwa tungod kay nagpuli-puli kini og pasulod sa ilang opensiba hangtod nga nagkatabla na sab kini pagpupos sa unang overtime, 65-65 hinungdan sa double overtime.
Sa ikaduhang overtime, wala na magpabangbang ang Bayabas sa maong duwa ug ilang giangkon ang kadaugan.
Ang maong liga nga nagdala sa tema "Improving Barangay, One Constituent at a Time" gipasiugdahan sa Sangguniang Kabataan (SK) ubos ni Hon. Pia Opura uban sa pag-abag sa Barangay Zapatera Council ubos sa liderato ni Hon. Jose Marino Benedicto.