Mipakita gihapon og maayong performance ang Cebu Wushu Team bisan og wala ang managsuong Agbay sa bag-o lang natapos nga 2008 National Wushu Championships didto sa Music Hall sa SM Mall of Asia sa Pasay City.
Ang wushu artists sa Sugbu mihakot og gold ug bronze medals.
Sila si Richelle Marie Ng ug Maribeth Canja Camello maoy mikabkab og bulawan alang sa Sugbu. Gawas sa gold, si Camello mihakot sab og bronze.
Si Ng nakaangkon dakung dungog sa tanang mga entrante kay ang otso anyos ug garbo sa Mandaue maoy nanghawod sa junior changquan division or long fist event ug nahimong labing bata nga gold medalist sa maong kompetisyon.
Sa laing bahin, si Camello, naghari sa taiji jian or sword category. Nakuha sab niya ang bronze sa taiji quan or bare hands.
Laing tulo ka mga sakop sa koponan ang nalandig sa ikaupat sa ilang tagsa-tagsa ka dibisyon. Sila mao si Gustine Padilla sa 24 steps taiji quan, Marie Mischelle Aimee Puche sa 42-steps taiji jian ug Erwin Boyones sa senior changquan.
Ang pagsalmot sa mga Sugbuanon ngadto sa Manila gisuportahan sa Wushu Federation of the Philippines-Cebu Chapter pinaagi sa paningkamot nilang Marcelo Yap, Elly Chua, Francis Onlatco, Jimmy Sy ug Antonio Jansing Chua.
Ang managsuong Agbay nga sila si Mary Stephanie ug Mary Evangeline wala makapakita’g aksiyon kay nag-ensayo kini karon sa Macau uban sa ubang sakop sa nasudnong koponan.