Pormal nga gibuksan ang Zapatera Summer League 2008 niadtong Domingo didto sa Don Bernardo Benedicto Gym sa Zapatera Elementary School sa dalan Sikatuna, ning siyudad.
Ang maong liga nga nagdala sa tema nga "Improving Barangay, One Constituent at a Time," gipasiugdahan sa Sangguniang Kabataan (SK) ubos ni Hon. Pia Opura uban sa pag-abag sa Barangay Zapatera Council nga gipangulohan ni Hon. Jose Marino Benedicto, kinsa maoy pinasidunggang dinapit ug mamumulong atol sa opening ceremonies.
Usa sa mga highlights sa opening day mao ang pagpili og best muse diin ang 17-anyos nga si Ana Marie Ngujo, usa ka tinun-an sa Cebu Doctors University maoy milangkat sa dungog, samtang ang 16-anyos nga si Dominic Adlawan sa University of San Carlos maoy nahimong "Escort of the Year."
Matud pa ni Opura, nga ang tumong ug tuyo sa ilang pagpahigayon og summer league mao ang paglingaw sa mga kabataan sa ilang barangay
Ang maong summer league adunay duha ka dibisyon -- ang juniors ug seniors divisions. Ang juniors division adunay unom ka teams, samtang ang seniors division adunay walo ka teams lakip na ang team sa barangay staff.