Torneyo sa GAA sugdan karong buntag

Gi-awhag ni coach Tata Merced sa Asian College of Technology (ACT) Cyber Knights ang bisan kinsang interesado nga mga estudyante nga mosalmot sa ipahigayon nga try-out sa Cyber Knights sugod ugma sa 8:30 sa buntag diha sa San Roque gym kilid sa Patria de Cebu.

Si Merced mibutyag nga ang try-out kabahin sa ilang pagpangandam sa mga uma-abot nga mga torneyo dinhi sa Sugbu ilabi na ang Visayas Amateur Athletic Association (VAAA) diin usa sila sa membro.

Mas gusto ni coach Merced nga mga bag-ong migradwar sa high school ang mga mosalmot sa try-out o di ba hinuon kanang gustong mobalhin ngadto sa ACT nga aduna pay playing years.

Sa dili usab madugay matod pa ni Merced, magporma sab og high school team ang ACT ug kini pagadalhon ni coach Rex Salvaña nga nagsilbing assistant coach sa Cyber Knights sa kasamtangan.

Adunay nag-ung ong nga application ang Cyber Knights alang sa Cebu Schools Athletic Foundation, Inc. (CESAFI) apan wala pa kini madesidehi hangtod karong panahona. (GGM)

Buksan karong  alas 8:30 sa buntag ang torneyo sa Guadalupe Athletic Association (GAA) didto sa Guadalupe Sports Complex.

Ang bag-ong napili nga presidente sa GAA nga si Dr. Boy Te, mipahibalo nga ang ilang gidapit isip guest speaker mao ang kolumnista sa The Freeman ug sports lider Rico Navarro.

Si Navarro mao sa’y mopahigayon og ceremonial toss uban ni Te ug pipila ka mga opisyales sa GAA.

Si Navarro deputy commissioner sab sa CESAFI ug maoy commissioner sa Cebu Youth Basketball League (CYBL) ug karon bag-o natudlo sab nga local partner sa founder sa Milo-BEST nga si Nic Jorge dinhi sa Sugbo.

Adunay pagahimoong parada sa mga atleta uban ang ilang tagsa-tagsa ka muse.

Anha magtigum ang mga mosalmot nga teams sa may eskina Banawa ug Guadalupe dapit sa merkado sa alas 6 sa buntag ug dayon himoon ang parada sa alas 7 sa buntag diin mo-martsa sila padung na sulod sa Guadalupe gym diin adto sab ipahigayon ang hamubong programa.

Si Te maoy bag-ong napili nga presidente sa GAA hulip kang Atty. Enric Rama, ang kanhi bise-gobernador sa Sugbo.

Kauban nga napili mao ang bise presidente nga si Lito Posadas, secretary nga si Boy Pedroza, assistant secretary Michael Granada, treasurer Marvi Lumapas, assistant treasurer Chito Nabua, auditor Arvin Vertudazo ug press-relations-officer Allan Ricaña.