Dili momenos sa 16 ka mga dekalibreng tennis players sa nasud ang mo-asdang sa Sugbu alang sa Cebuana Lhuillier Men’s Open Tennis Cup nga gikatakda karong Mayo 4-11 diha sa Baseline tennis courts.
Ang no. 1 player sa nasud nga si Johnny Arcilla sa Butuan City apan atua na karon sa Manila moapil sa tigiay uban nilang PJ Tierro, Rolando Ruel ug Yannick Guba.
Lain pang banggiitang tennis player nga si Niño Alcantara ang mopakita sa iyang katakus sa usa ka semana nga kompetisyon. Ang 16-anyos nga si Alcantara sa Malaybalay, Bukidnon maoy no. 1 player sa RP Junior ug ika-70 sa ranking sa International Tennis Federation (ITF).
“We would like to promote the sport in the country, help the tennis players and find local talents who can represent the country in the international scene. We would like to help the tennis industry as a whole,” matud pa ni tournament administrator April Toledo.
Sa tuyo nga madasig ang mga batan-ong tennis potentials, ang top 16 players dad-on dinhi sa Sugbu aron ibangga sa pambato sa Sugbu sama nilang Boh Alburo ug Mike Quiñones ug uban pa.
Si Jun Toledo, ang event organizer miingon nga ang torneyo adunay duha ka kategoriya -- singles ug doubles events. Bukas kini sa mga magduduwa nga nag-edad og 18-anyos ug pataas.
Ang qualifying round himuon karong Mayo 4-5, samtang ang main draw gikatakda sa Mayo 6-11.
Adunay gi-andam nga P100,000 ganting salapi alang sa mga mananaog.
Ang registration fee nagkantidad og P500 matag magduduwa. Ang deadline sa pagpanglista karong Mayo 3.
Alang sa dugang mga kasayoran, mahimong motawag o text ni tournament referee Boy Callao sa 0928-3735260.