ECCP-Cebu Chapter mopasiugda'g 1st football festival karong Domingo

Sa labing unang higayon, ang European Chamber of Commerce of the Philippines (ECCP)-Cebu Chapter mopahigayon og football festival ugma diha sa Cebu International School (CIS) football field sa Talamban, siyudad sa Sugbu.

Ang usa ka adlaw nga kompetisyon nga gi-sanctioned sa Cebu Football Association (CFA) bukas sa mga sakop ug mga dinapit nga dili sakop sa maong kahugpongan.

Pito na ka koponan ang mipadayag sa ilang partisipasyon nga naglakip sa Detalia Aurora Warriors (DAW), Detalia Aurora Kings (DAK), Tsuneishi (TS), People Support (PS), Fairchild (FC), NCR ug Lear (LR).

Matud pa ni tournament director ug Bright Academy Head Master Neil Montesclaros nga ang kalihukan mosagop sa mixed open division, apan pagbuot sa tanang teams kun mokuha ba sila og babaye nga players.

Matag team kinahanglan nga langkuban og labing menos walo ug labing daghan 10 ka magduduwa ug kinahanglan sab nga kawani sa kompaniya nga ilang giapilan.

Mosubay ang kompetisyon og single round robin format sa eliminasyon diin ang top four teams mo-abante ngadto sa semifinals.

Bisan pa niini,  kun ang usa ka team moharos og daog sa eliminasyon, awtomatik na kini nga koronahan  isip kampiyon.

Mga tropeyo ug medalya ang ihatag ngadto sa mga mananaog sa maong kompetisyon nga gipaluyohan sa Sunsport, Magnolia ug Virginia Foods Inc.