Dumaguete mo-host sa Time Out Summer Clinic

Human sa Lilo-an ug Danao, ang 10th season sa Time Out Summer Basketball Clinic motabok ngadto sa Dumaguete City diin adto kini mopahigayon og clinic gikan sa Abril 28 hangtod sa Mayo 28 sa ABC Learning Center Gym.

Ang usa ka buwan nga cage camp bukas sa mga lalake ug babaye nga nag-edad gikan sa pito hangtod sa 12 anyos alang sa beginners level ug 13 hangtod sa 17 anyos alang sa advantage level.

Ang training sessions himuon sa matag adlaw gikan sa ala-1:00 hangtod sa alas-3:00 sa hapon alang sa beginners ug gikan sa alas-3:00 hangtod sa alas-5:00 sa hapon alang sa advantage campers.

Si Rex Salvaña, ang kanhi assistant coach sa Cebu  Gems sa nabungkag na nga Metropolitan Basketball Association (MBA) ug mao sab ang migiya sa Holcim Pryce Pharma MisOr paglansang og back-to-back championships sa Mindanao Division sa Mindanao Visayas Basketball Association (MVBA), maoy mangulo sa pagpadagan sa maong summer camp.

Mo-abag ni Salvaña mao sila si kanhi PBA star Teroy Albarillo, kinsa kadaghan na sab nga nakadala og team sa commercial league.

Ang registration fee nagkantidad og P1,200 libre na ang training uniform ug basketball.

Nagpadayon na karon ang enrolment. Niadtong buot magparehistro ug dugang mga kasayoran kontaka lang si Mr. Marimat sa 420-5045, 422-1278, 225-8089, 0916-4534639 or 0928-5036686.