Coke napilde na gyud

Gipatilaw sa Air 21 Express sa una  nilang kapildehan ang Coca-Cola Tigers kinsa miyukbo human sa tulo ka daug sa iskor, 102-95 sa nagpadayon nga Smart PBA Fiesta Conference kagabii didto sa Araneta Coliseum.

Pinaagi sa pag-abag sa ilang import nga si Steven Thomas, maayo sab kaayong nakaduwa si Arwin Santos kinsa mipugnit ug 21 puntos ug milangkat ug 14 ka rebounds sa usa na sab ka double-double.

Kanunay na gyud nagsige ug abante ang Express sa fourth quarter ug naglawig sila sa ilang ikaduha ka daug dihang nakakuha sila’g 97-867 nga labaw may 1:47 na lang ang nahibiling oras.
Tungod sa maong kadaugan, ang Express aduna nay 2-2 nga baraha samtang mao kadto’y unan pilde sa Tigers kinsa nagbitbit na’g 3-1 nga baraha ug pabiling hapsay ang record sa Sta. Lucia kinsa nagtangag ug 3-0 nga baraha lakip ang ilang 101-97 nga kadaugan batok sa Ginebra sa miaging adlaw didto sa Tacloban City.

Ang Express mihakot sab ug 29 ka assists tungod sa kamaayo sa ilang gipakitang duwa kagabii, ang 11 niini gikan kang Wyne Arboleda.

Si Mark Clemens Telan gipasidunggan sab tungod sa iyang nakab-ot nga 1,000 rebounds sa iyang basketball career.

Wala kaayo kahuygo ang duha ka imports sa Tigers nga sila si Jason Dixon ug Gee Gervin kay nagpungasi ang opensa sa Express.

Ang Tigers gitugotan ug duha ka imports tungod sa ilang ngil-ad nga gipakita sa miaging conference diin usa sila sa nagkayamukat nga team.