Wala palabya ni Albert Basirgo ang panahon ug miarangkada gilayon kini pagsugod sa lumba aron pagdaog sa Danao City Summer Bikefest nga nagsubay og Danao-Lugo-Danao route niadtong miaging adlaw.
Si Basirgo, kinsa nakamatikod sa kadaghang lig-ong kontra mibulhot ug mibuwag gikan sa nagpundok nga riders pagbuto sa starting gun aron paglangkat sa korona sa Class-A.
Mipahulina sa ikaduha nga dapit mao si Jaybop Pagnanawon ug gisundan ni Niño Surban alang sa ikatulong dapit.
Lain pang nagmalampuson nga rider mao si Junvie Pagnanawon, kinsa naghari sa Class-B, uban ni Ramon Espinosa nga mitapos sa ikaduha ug si John Gayatin nga mi-okupar sa ikatulo nga dapit.
Sa laing bahin, si Romeo Sanchez, mao sab ang midaog sa "By Invitation Only" category batok nilang Jose Gerry Lagatic ug Gary Fernandez.
Gidominar sab ni Rudy Cordero ang Red Baron category o cyclists kinsa nag-edad og 50-anyos ug pataas. Gisundan kini ni Rogelio Basirgo kinsa mitapos sa ikaduhang dapit ug Jaime Noynay alang sa ikatulong dapit.
Adunay kinatibuk-ang 82 ka mga partisipante ang miapil sa maong lumba nga gipasiugdahan sa Danao City Sports Commission.