Nagkatubo ug nagkalapad ang tinuig nga MS Motosuit Motocross Series nunot sa pagsud sa Imarflex Battery Manufacturing Corp. isip major corporate backer sa ilang umaabot nga mga lumba sa Visayas ug Mindanao.
Isip ilang initial venture, ang Imarflex EvVo, ang nag-unang maintenance free motorcycle battery himuong main presentor sa third leg sa 2008 MS Motosuit Series nga ulohan og “10th Ornopia Cup” karong Abril 12-13 sa Calambua, San Remigio.
“I’m really very happy with our tie-up with Imarflex. It is an added mileage for us knowing that our motocross series is getting bigger and better each year,” matud pa ni MS Motosuit top honcho Lou Ornopia, ang 2006 Sportsman of the Year awardee sa Sportswriters Association of Cebu (SAC).
“We want to have a strong visibility/exposure for our products through our tie-up with Mr. Ornopia,” matud pa ni Percival S. Villarba, ang Imarflex Battery Vis-Min regional sales manager.
Ang lumba sugdan pinaagi sa Enduro Challenge Trail Riders karong Abril 12. Ang motocross showdown himuon sunod adlaw diin dul-an sa 100 riders lukop nasud ang gipaabot nga mopakita sa ilang katakus pagpalupad sa ilang mga motor.
Pipila ka mga riders ang angayan lantawon sa duha ka adlaw nga kompetisyon mao si undisputed motocross king Glen “D’ King” Aguilar ug John Flores nga pulos modelo sa MS Motosuit ug ang reigning “Rider of the Year” nga si Juvannie Abellar.
Gawas sa ganting salapi ug tropeyo, ang nag-unang riders sa managlahing dibisyon may kahigayonan nga modaog og usa sa duha ka bag-ong motorcycles kortesiya ni Seigfred Ornopia, ang tag-iya sa Keiz BJ Motor Sales and Services. Ang laing usa ka motorsiklo gitagana alang sa mga dumoduong.
Dugang pa niini, ang Imarflex mohatag sab og give-aways sama sa t-shirts, caps, key chains, assorted spark plugs ug stickers ug mopahigayon sab kini og libreng battery check-up atol sa maong kalihukan.
Ang ikaduhang edisyon sa motocross series molabang sa Ayugon, Negros Oriental karong Mayo 4 ug mobalik sa San Remigio sa Mayo 11 alang sa 2008 Mayor Mar Martinez Cup.