Lapu-Lapu hari sa 1st Inter-city

Ang Lapu-Lapu City Chiefs ni coach Larry Villanil maoy kampiyon sa 1st Inter-City Challenge Cup basketball tournament human maka-lingkawas sa ikaduhang higayon batok sa Bogo City Bogoys sa iskor nga 79-76 sa Game-3 sa ilang "best-of-three" finals niadtong Domingo sa gabii didto sa Lapu-Lapu Plaza covered court.

Gawas nga nakabitbit og championship trophy, ang Lapu-Lapu Chiefs nakasipit sab og grand prize nga P2 million nga kantidad nga mga proyekto gikan sa Countrywide Development Fund (CDF) ni Senate president Manny Villar.

Ang Talisay City Aquastars maoy mipahiluna sa ikatulong dapit human nila pildiha ang Danao City Pistols sa iskor nga 95-83.

Medyo nabangog pa'g gamay sa ilang 78-79 nga kapildihan sa Game-2 niadtong Sabado didto sa Bogo nga nakapuwersa sa serye ngadto sa tinaktakay nga Game-3, ang Lapu-Lapu nabiyaan og 12 puntos, 16-28 sa sayong bahin sa second period, apan ang hugyaw sa ilang mga dumadapig nga gipangulohan ni Mayor Arturo 'Boy' Radaza ug sa  kapikas niining si Paz, ang barangay captain sa Mactan, ang Chiefs kalit lang nga misulpot ug hinay-hinay nga mikitkit sa labaw pinaagi sa 19-11 nga rally aron pagtabla sa iskor, 33-all sa nahabiling 1:26 sa ikaduhang kuwarter.

Ang Bogoys nakabawi sa ilang nuybe puntos nga labaw, 46-37, apan ang Chiefs wala mahutdi og paglaum ug nakigsinukliay kini og mga puntos ug gani nagpulipuli kini'g ilog sa labaw.

Pagsugod sa fourth period, gipakita sa Chiefs ang ilang katig-a pinaagi sa mga krusyal nga mga baskets nila ni Jarjar Degamo ug Rino Berido aron pagselyado sa kadaugan.

Sa nanghinapos nga bahin sa duwa, nasaypan ang opisyal nga iskor tungod kay ang duha ka free throws ni Jun Ace Ursal naihap kini og tres puntos. Gikan sa 65-69 tally, angay unta nga 67-69 ug dili 68-69, apan wala kini panumbalinga ug padayon ang mainitong kumbati. Maayo na lang kay nakahimo’g pito ka  sunod-sunod  nga  puntos  ang Chiefs aron  pag-inat sa labaw, 76-70 sa nahabiling 2:14 sa duwa.

Subling nakasikit ang Bogoys sa iskor, 76-78 ug makahimo pa unta kini sa pagtabla sa duwa apan nasipyat ang tira ni Noel Balili ug si Orly Amores maoy mitibawas sa oras sa duwa pinaagi sa iyang usa ka free throw.

“Our team still needs  more polishing, it lacks the experience. Nevertheless, it was really a very nice game and we succeeded in our campaign,” matud pa ni Mayor Radaza.

“At least na-proved namo nga deserving mi ma-champion. Didto ra gani unta sa Game 2. Nagpasalamat ko sa akong mga players nga bisa’g nabiya-an mi, wala gihapon mo-give up. Grabe gyud ilang determinasyon,” matud ni  coach Villanil.

Si Degamo maoy nangu sa Chiefs sa iyang 21 puntos, samtang si Ritchel Falcon adunay 14 puntos ug si Amores miamot og 10 puntos.

Ang Bogo kinsa miduwa nga wala si Kim Valenzuela nga wala paduwaa tungod sa duha ka unsportsmanship fouls gipangulohan nilang Ursal ug Balili nga mihipos og 28 ug 25 puntos mata’g usa kanila

PUNTOS MATAG USA:

Lapu-lapu (79) -- Degamo 21, Falcon 14, Amores 10, Berido 9, A. Pancho 8, Dalumpines 5, Soroño 4, Morata 4, Baguio 2

Bogo (76) -- Ursal 28, Balili 25, Seno 9, Pelayo 8, Valenzuela 4, Pedroza 4, Casinillo 2, Asingua 1