Baby Skyblazers, Wildkittens mag-ilog sa katapusang lingkoranan

Ang Salazar Colleges of Science and Institute of Technology (SCSIT) Baby Skyblazers ug ang Cebu Institute og Technology  (CIT) Wildkittens nga gipaluyohan sa Pygnogenol magpinaksitay  karong Domingo alang sa katapusang luna sa 4th M. Lhuillier Kwarta Padala Under-21 Basketball League sa San Roque Parish Gym sa barangay Subangdaku, dakbayan sa Mandaue.

Ang duwa gikatakdang sugdan sa alas-7:00 sa gabii.

Ang modaog maoy makaangkon og katungod sa pakigharong sa nagpaabot nga MLSDF Selection alang sa tinaktakay nga kampiyonato.

Nakuha sa MLSDF Selection ang unang lingkoranan sa finals human nila gipalagpot ang Agukoy National High School (ANHS) sa Consolacion.

Ang top performing teams makadawat og tropeyo, samtang ang medalya ang ihatag ngadto sa individual achievers sama sa MVP ug ang mga sakop sa Mythical Five.

Ang usa ka buwan nga torneyo gipasiugdahan ni M. Lhuillier Sports Development Foundation executive director Eddie B. Ybañez uban sa superbisyon ni commissioner Aurelio Eslawan.