Pajo sud sa semis

Miabante na sa semifinal round ang Pajo Selection human sa ilang 58-56 nga kadaugan batok sa University of San Carlos (USC) sa 1st Hapee Online Challenge Cup Under-17 basketball tournament didto sa Cogon-Ramos Gym.

Gidominar sa Pajo Selection ang tibuok duwa pinaagi sa pagpangulo ni Allan Gear Sala kinsa mibahog og 28 puntos nga igo na kaayong ilhon isip  Dewfoam Player of the Game.

Ang Pajo Selection nakig-uban na sa Don Bosco Greywolves ug sa Center for International Education (CIE) Lions sa ikaduhang hugna.

Ang CIE Lions napukan sa ilang katapusang duwa sa eliminasyon ngadto sa Hapee-Online Basketball Training  Camp sa iskor nga  48-54, apan usa na lamang ka non-bearing game tungod kay nakaangkon na man sila og luna sa semis.

Alang sa Training Specialists, ang maong kadaugan  maoy  labing   mahinungdanon kay mao kini nagtugpo kanila alang sa tinaktakay nga duwa batok sa USC Baby Warriors karong Huwebes diin ang modaog maoy makaangkon sa katapusang luna sa semis.