Mga langyaw nangharos sa hall of fame

Pipila sa mga lokal nga eskrimadors nga sakop sa Cacoy Doce Pares World Eskrima Federation, malipayong midawat sa ilang mga pasidungog atol sa pagpahigayon  nga 2008 Doce Pares Hall of Fame awards ceremony sa miaging adlaw didto sa Holiday Plaza Hotel grand ballroom sa dan F. Ramos ning dakbayan. 

Ubay-ubay gyud nga mga eskrimadors ang midawat sa ilang mga pasidungog apan kadaghan kanila mga langyaw kinsa way kabutangan sa kalipay dihang midawat sa ilang tropeyo nga estatuwa sa Sugbuanong manggugubat   ug chieftain nga si Lapulapu nga nagkupot ug olisi sa duha niya ka kamot. 

Mga inilang sakop sa Doce Pares nga midawat sa ilang tropeyo isip sakop sa Hall of Fame mao sila si Richard Bustillo, Vince Palumbo,  Anthony Clemons, Dr. Carlos Patalinghug Sr. ug Carlos Jr., Florencio Caunteverio, Jan Mac, Chuck Cañete ug ang spiritual leader nga si Nonito “Dodong” Limchua, ang tag-iya sa Cebu Catholic Television Network (CCTN) mao lamang ang pipila sa may 100 ka langyaw nga mihugop sa lapad nga hawanan sa Holiday Plaza Hotel grand ballroom.

Gani, bisan ug pipila sa mga langyaw ang wala makatambong sa seremonyas, nagdu-ot gihapon ang mga ginsakpan ni Cacoy atol sa nahisgotang kalihokan nga talagsa-on lang masaksihan dinhe sa Sugbo.

Usa sa pinakadaku ug makasaysayanong pasidungog mao ang paghatag og award ngadto kang Cacoy Doce Pares president for life nga si Supreme Grandmaster Ciriaco “Cacoy” Cañete ngadto sa Hall of Fame lakip ang duha ka posthumous awards alang sa mga co-founders sa Doce Pares nga sila si Eulogio “Yoling” Cañete ug Felimon “Momoy” Cañete.

Wala sab gyud mabentaha-i  ang 88-anyos nga si Cacoy tungod kay dili kay maka-usa lang siya matudlo ngadto sa Hall of Fame, ang uban niini didto niya madawat sa Estados Unidos.
Sa iyang hamubong pakigpulong, si Cañete mikutlo’g gamay nga pinulongan gikan sa bala-ang Bibliya nga nagkanayon “many are called but few are chosen”.

Iyang gipasabot nga daghan ang mitabang aron ma-inila sa tibuok kalibotan ang eskrima apan diotay ra sila ang gitawag nga angayan modawat ug pasidungog.