USJ-R Spiking Jaguars nagtinguha og 3-0 sa CESAFI Beach Volley

Mobalik na sab ang aksiyon sa 2nd Cebu Schools Athletic Foundation, Inc. (CESAFI) Beach Volley tournament sa Inayagan Beach Resort sa Naga City.

Ang duwa sugdan sa alas-8:00 sa buntag diin ang University of  San Carlos (USC) Spiking Warriors moharong sa University of Cebu (UC) Webmasters sa men's division.

Sa laing bahin, ang University of San Jose-Recoletos (USJ-R) Jaguars nagtinguhang mokulit sa ilang ikatulong sunod-sunod nga kadaugan dihang makigtigi kini sa Cebu Doctors' University (CDU) Stallions

Ang Southwestern University (SWU) Lady Cobras moduwa  batok sa USC Lady Warriors alang sa women's division.

Sila si Genie Sabas ug Michelle Simbajon sa USJ-R Lady Jaguars ni coach Grace Antigua makighamag sa CDU Lady Spikers ni coach Fr. Rey Manayon, samtang ang katapusang duwa sa buntag, ang  University of Southern Philippines Foundation (USPF) Lady Panthers moharong sa UC Lady Webmasters.

Sa hapon, ang UC Webmasters makigsangka sa USPF Panthers, samtang ang USC Warriors makigsambunot sa CDU Stallions sa men's division.

Seguradong mahinuklogon ang duwa sa SWU Lady Cobras ug USJ-R Lady Jaguars kinsa mag-ilog sa unang dapit sa women's division.

Ang katapusang duha ka mga duwa karong adlawa mao ang engkuwentro tali sa USC Lady Warriors ug UC Lady Webmasters ug ingon man ang CDU Lady Stallions batok sa USPF Lady Panthers.

Ang maong kompetisyon nga gitukod sa Cebu Volleyball Federation (CVF) ubos sa pagpangulo ni Raul Gonzales tapuson karong Marso 8.

Usa ka konsiyerto ang himuon sa Marso 9 diha sa Cebu Coliseum nga maoy pormal nga motak-op sa 2007  season.