Buksan na karong adlawa ang 2nd Cebu leg Cherifer Tangkad Sagad 12-Under basketball tournament nga sugdan sa alas-7:00 sa buntag diha sa Don Bosco covered court sa barangay Punta Princesa ning siyudad.
Adunay 16 ka teams ang mipadayag sa ilang partisipasyon, apan 12 lang ang nakaduso sa ilang line-ups ngadto ni Cebu leg organizer Britt Carlo Reroma.
Kini mao ang defending champion USC-North Campus, USC-South Campus, Cebu Eastern College, Immaculate Heart of Mary Academy sa Minglanilla, Philippine Christian Gospel School, Power Play (A), St. Alphonsus Catholic Schools (SACS) sa Lapu-Lapu City, Salazar Colleges of Science and Institute of Technology, St. Anthony Learning Center sa Talisay, USJ-R (A & B) ug ang USPF.
Ang upat ka teams nga gikatakdang moduso sa ilang line-ups karong adlawa mao ang host Don Bosco, Power Play (B), Sirlitz Clinic ug ang Danao Sports Commission-Time Out.
Ang torneyo sa Cherifer gitumong aron paghatag sa mga kabatan-onan nga nag-edad og 12-anyos paubos og kahigayonan sa pagbaid sa ilang abilidad ug pagpakita sa ilang katakus sa maong matang sa paugnat sa kusog.
Si Reroma nagkanayon nga ang advertising ug marketing director sa Intermed Marketing Phils., Inc. nga si Tom Meneses motambong sa opening ceremonies karong adlawa.
Ang Intermed maoy exclusive distributor sa mga produkto sa Cherifer.
Ang San Beda juniors coach nga si Edmundo 'Ato' Badolato maoy tournament director, samtang ang national organizer mao si Bernard Ocampo.