Ang University of San Jose- Recoletos (USJ-R) Jaguars ug ang University of San Carlos (USC) Warriors pulos nagpas-an og daog human nila gipukan ang ilang tagsa-tagsa ka kaatbang sa 2nd Cebu Schools Athletics Foundation Inc. (CESAFI) Men’s and Women’s Beach Volleyball tournament kagahapon didto sa Inayagan, Naga City.
Ang USJ-R Jaguars ni coach Grace Antigua mipabuhagay sa ilang kusog sa opening games dihang ilang gilubong ang University of Cebu (UC) Webmasters, 25-7. Ang tandem nilang Ariel Carumba ug Loujie Tipgos yano kaayong mipukan nilang Jonathan Iñez ug Francis Llaguno sa UC.
Sila si Tipgos ug Carumba mao ang representante sa USJ-R sa umaabot nga Nestea Beach Volley tournament karong tuiga.
Sa laing bahin, ang 2007 Nestea Beach Volley Regional Champion University of San Carlos (USC) Spiking Warriors ni coach Norvie Labuga mipatigbabaw batok sa University of Southern Philippines Foundation (USPF) Panthers, 25-15.
Si USC team captain Roderick Arenasa ug si Edward Carlo Tecson nagpakita sa ilang maayong labok batok sa USPF dihang ilang gikuhaag kusog ang tandem nilang James Ryan Rivera ug Edward Ybañez.
Ang USPF mipakita og maayong sugod apan naputol kini dihang miarangkada sila si Arenasa ug Tecson.
Ang Lady Jaguars wala gyud magpakita og kalapoy dihang ilang gipilde ang USPF Lady Panthers, 25-13. Ang former junior RP team member nga si Genie Sabas ug Michelle Simbajon milusad og lima ka rallies sa ilang panagsangka batok sa duo nilang Erika Camille Verano ug Herlene Ybarita.
Lahi sa ilang men’s team, ang Lady Warriors nagkinahanglan pa og usa ka slide una nakuha ang 26-24 nga kadaugan batok sa Cebu Doctors University (CDU) ni coach Fr. Rey Manayon.
Usa kadto ka tam-is nga kadaugan nilang Kim Ybañez ug Jerymie Montalbo kay ilang napuhalan ang kabangis nilang Lynette Auza ug Katherine Fe Cemanes sa ilang kulbahinam nga duwa.
Sila si Lorie Layno ug Jessa Satina sa Southwestern University (SWU) Lady Cobras, nanghawod usab batok nilang Jade Pilapil ug Madel Salinas sa UC Lady Webmasters,
25-11.
Sila si Lorie Layno ug Jessa Satina sa Southwestern University (SWU) Lady Cobras, nanghawod usab batok nilang Jade Pilapil ug Madel Salinas sa UC Lady Webmasters,
25-11.