SRFC, Bright Academy, Don Bosco XI mipatik kasaysayan sa Thirsty footfest

Ang San Roque Football Club (SRFC) booters maoy labing unang kampiyon sa 40-above category sa 5th Thirsty Football Festival kagahapon didto sa Cebu City Sports Center.

Gipukan sa SRFC ang Springdale Dads Football Club aron paghari sa ilang dibisyon nga gilakip sa unang higayon sa lima ka tuig nga kasaysayan sa tinuig nga liga.

Mikulit sab og kasaysayan ang Bright Academy Football Club lady booters inaugural champion sa Girls-14 division human nila gipaluhod ang SRFC sa finals diin si Jessica Knight sa Bright Academy maoy milangkat sa MVP award.

Wala sab magpaulahi ang University of San Carlos (USC) Lady Warriors dihang ilang gipukan ang SRFC aron maghari sa Girls-19 class.

Sa laing bahin, ang Don Bosco College midaog og duha ka titulo sa Boys 12 ug Boys 14. Gipukan sa Bosconians ang PAREF Springdale Football Club aron maghari sa Boys 12, samtang ila usab nga gipilde ang Cebu International School (CIS) sa Boys 14 division.

Hinuon, pakyas ang Bosconians pagsakmit og laing titulo human kini mapilde sa Giuseppe Football Club sa Players 6 finals. Ang Bosconians gipaluhod sab sa PAREF Springdale sa Players 10 finals.

Ang aksiyon sa  tulo ka adlaw  nga football festival nga gipaluyohan sa Thirsty Juices and Shakes  tapuson karong adlawa diha sa Cebu City Sports Center.