Ginobili nag-wild batok Cavs

Init pa sa nag-aso nga bulkan ug kusog pa sa kilat ang Argentinian superstar nga si Manu Ginobili dihang iyang gipangulohan ang defending champion San Antonio Spurs pagpukan sa Cleveland Cavaliers sa iskor nga 112-105 sa nagpadayong duwa sa National Basketball Association kagahapon didto sa Quickens Loan Arena sa Cleveland, Ohio.

Si Manu Ginobili miratsada og season-high 46 puntos ug career-high nga walo ka triples. Si Ginobili mipatusak og upat sa upat ka triples ug mi-iskor og 18 sa fourth quarter.

"I’m just happy he’s in my team”, matud pa ni Tim Duncan kinsa mitampo og 23 puntos.

Ang Spurs mirehistro na karon og 34-17 win-loss record.

Ang pilderong Cavaliers gipangulohan ni Lebron James kinsa miposa og 39 puntos lakip na niini ang iyang 18 sa fourth quarter apan wala kini makatabang sa pagpadaog sa iyang koponan, samtang si Larry Hughes  mitampo og 26 puntos.

 Ang Cavs aduna na karoy 29-23 win-loss nga baraha.

Sa laing mga duwa, ang Boston Celtics midaog batok sa New York Knicks, 111-103,  giihaw sa Los Angeles Lakers ang Minnesota Timberwolves, 117-92, ang Houston Rockets  naka-eskapo gikan sa mga kamot sa  Sacramento Kings, 89-87, naka-ipsot sab ang Golden State Warriors sa mga kamot sa  Phoenix  Suns, 120-118.

Ang Orlando Magic mipukan sa Denver Nuggets, 109-98, gipukan sab sa Toronto Raptors ang New Jersey Nets, 109-91, ang Philadelphia 76ers milubong sa Memphis Grizzlies, 102-88, midaog sab ang Detroit Pistons batok sa Indiana Pacers, 96-80, ang New Orleans Hornets miihaw sa  Milwaukee Bucks, 111-107, ang Utah Jazz mimakmak sa Seattle Supersonics, 112-93.

Ang Washington Wizards midaog batok sa LA Clippers, 91-89 samtang gilubong og 20 puntos sa Dallas Mavericks ang Portland Trailblazers sa iskor nga 96-76. (Gabby G. Malagar)