Sayod kita nga usa sa naandan nga ensayo sa manok igtatari mao ang sikad kay mao kini makahatag og kalig-on sa bukog ug kaunoran sa tiil ug paa sa manok aron sa panahon sa sultada dili dali nga mapukan. Kay sagad sa mga manok nga i-apil og sultada isikad sa dili pa kini buhian sulod sa ruedahan. Madiskubre sa sikad kun anaa bay kusog ang manok kay panahon niana manguma man og maayo ang manok nga kusgan.
Kining kanunay nga pagsikad sa manok daku og ikatabang kay ang tiil mao may ilang hinagiban. Gikinahanglan nga lig-on ug paspas mobunal aron sa pagpataub sa kaatbang niini, ang manok nga huyang og paniil dili kaayo makapadulot sa iyang tari.
* * *
Adunay nagkadaiyang sikad sa manok. Adunay sikad nga inilonggo, naa sab ang inalsa nga sikad, naay sikad nga pagukuron ang manok sa kaatbang niini nga picker nga gigunitan ang ikog, naay sikad nga pahataon og abot ang manok dayon sakwaton o buhian ug pagukuron sa picker.
Kining nagkadaiyang sikad adunay ilang rason aron magamit sa manok panahon sa sultada. Matud pa sa mga eksperto, sa pagpalihok sa manok magamit ang kanunay nga sikad sa paglihay og dali nga sa pagliso sa manok kun kini hamagon sa kaatbang ug dali sab siya makapahigayon sa iyang pagbawos.
* * *
Akong mahinumduman nga wala pa ang bidlisiw sa kabuntagon nagmata na ang akong apohan nga si Ramon aron sa pagsikad sa iyang manok. Ako siyang giduol ug gipangutana nganong sayo man kaayo niya atimanon ang manok. Matud pa niya aron lig-on ang lawas niini kay bugnaw pa ang palibot nga gi-ensayo ang iyang manok ug inigkahuman iya dayon kining liguon, pakan-on ug ilansad.
Sa nagkadaiyang farm nga akong nasudlan ug napangutan-an mahitungod sa sikad sa manok, lain lain na ang ilang oras sa pagpahigayon sa sikad pero dili mawala ang sayo sa buntag nga sikad. Naa nila mopahigayon og gabii nga ilang apilan sa pagsuga aron maanad ang manok sa kahayag sa flourescent kay mao man kini ang matang sa suga nga gamiton atol sa derby.
Manok Debwenas
(Pebrero 15, 2008)
Balhibo: Binabaye (henny)
Bulok sa tiil:Yellow
Mga pangutana ug suhisyon? Text sa 09192988988 o email: sultada.abano@yahoo.com