Adunay tulo ka matang sa break shots nga maoy kanunay gamiton sa magdudula sa ilang pagpahigayon sa unang tayada ibabaw sa billiard table. Kini mao ang soft break, cut break ug power break.
Kasagaran sa mohimo'g soft break mao ang mga batan-on nga bilyarista. Silay nagpasikat ning maong matang sa break shot. Ang mga batan-ong bilyarista dili kaayo komportable sa power break nga maoy naandan usab sa beterano nang mga magdudula.
Si bisan kinsang magdudula, batan-on o beterano na, modangop sa cut break ingon ng alternatibo kun dili mosalir ang naandan nilang break shots. Mahimong hinay o kusog ang cut break. Epektibo sab kining maong break labina'g susihon una sa magdudula ang nagtapok nga mga bola kun may opening ba kini ngadto sa pocket.
Importante man gud sa break shot nga makapasulod og object ball ang magdudula. Kun makahimo siya'g dry break, makahigayon ang iyang kaatbang pagtira ug pagkontrolar sa lamesa. Mao nga kutob sa mahimo, kinahanglang paningkamotan sa magdudula nga dili mawala kaniya ang kontrol sa dula. Usa sa paagi sa paghimo niini mao ang pagpahigayon og epektibo nga break shot.
Depende sab sa estilo sa magdudula ang pagsagop niya sa usa ka partikular nga matang sa break shot. Sa estilo ni Efren 'Bata' Reyes ug Francisco 'Django' Bustamante, mas epektibo ang power break. Apan sa estilo nila ni Alex 'The Lion' Pagulayan ug Jeffrey de Luna, mas epektibo sab ang soft break.
Busa sa dili ka pa mopahinayak pagsagop sa usa ka partikular nga matang sa break shot, sutaa una kun mohaom ba kini sa imong estilo. Kay kun dili kini mohaom sa imong estilo, dili usab kini epektibong paagi sa imong pagdula.
* * *
MAGBILYAR TA TEXTMATE PORTION: 0910-8217672, 0918-5183038, 0928-4616986, 0910-2606173, 0921-7713510 (Juanlyn of Bulacao), 0918-7500735, 0910-4691540, 0929-2543906, 0920-6728476 ug 0918-3781766. Text na!
* * *
(Mga sugyot ug pakisayod? Text sa 0910-8105522)