Mopabuhagay na sab sa ilang sila si WBO Intercontinental super bantamweight champion Rey 'Boom Boom' Bautista ug WBO youth super flyweight king AJ 'Bazooka' Banal batok sa tagsa-tagsa nila ka kaatbang ubos away ni Gerry Peñalosa kinsa modepensa sa iyang WBO bantamweight title batok ni Ratanachi Sor Vorapin karong Abril 6 sa Araneta Coliseum.
Mao kini ang gipatin-aw ni Michael P. Aldeguer, ang presidente sa ALA Promotions human sa ilang panag-istoryahay Eric Gomez, ang vice president sa Golden Boy Promotions.
Si Bautisa nga adunay 23-1-2 win-loss-draw 13 ka daog pinaagi sa knockouts modepensa sa labing unang higayon sa iyang WBO regional belt batok sa Mehikanong si Genaro 'Duro' Camargo, kinsa nagbitbit og 16-3, 10KOs.
Sa 10 ka boksidor nga iyang gipakamang, upat niini ang miyaka sud lang sa unang hugna, lakip na ang usa niini nga wala makatiwas sa first round.
Human sa iyang una ug bugtong kapildihan ngadto sa mga kamot ni WBO super bantamweight champ Daniel Ponce de Leon niadtong Agosto sa miaging tuig, si Bautista nakabawi ug iyang gilangkat ang WBO Intercontinental super bantamweight title gikan ni Antonio Meza niadtong Disyembre sa miaging tuig.
Sa iyang bahin, si Banal (16-0-1, 13KOs) mopakita sab sa iyang abilidad batok sa walay pildeing WBC Latino super flyweight Caril 'El Raton' Herrera sa Uruguay.
Si Herrera nga wala pa makatilaw og pilde sa 21 ka away diin 13 sa iyang mga biktima pulos gipakamang maoy rated WBC No. 2, WBA No. 8, ug IBF No. 12.
Kulba kaayo ang iyang unang away isip pro dihang iyang gipaundang sud lamang sa unang hugna si Alejandro Lim niadtong Agosto 23, 2003.