Jaguars, Cobras mag-ilog sa titulo

Gituohan ang University of San Jose-Recoletos nga maoy modaog sa titulo sa La Fortuna Cup  sa ilang pakigsangka batok sa Southwestern University (SWU) Cobras sa tinaktakay nga kampiyonato karong adlawa diha sa Cebu Coliseum.

Molamas sa kampiyonato mao ang duwa tali sa  Asian College of Technology (ACT) Cyber Knights  ug University of San Carlos (USC) Warriors nga mag-ilog alang sa ikatulong dapit.

Ang USJ-R Jaguars maoy humot nga manag-iya sa korona  human giharos ang single round elimination sa baraha nga 4-0.

Si Luther Luke Justiniani gipaabot nga mao na sab ang mangulo sa opensa sa Jaguars.  Naglaum sab kini sa suporta nilang Lyndon Gudez, Ranulfo Malinao, Manny Gabas, Randy Pogoy, Jessmar Villahermosa ug Bobby Hatague.

Ang Cobras mopahimus sab sa ilang height-advantage nga mo-alkontra sa bangis nga Jaguars. Pahimuslan ni coach Dodie Miego ang pagbalik ni Mariano Canonigo, uban nilang Eric Zanoria, Richard Gianchand, Clifford Maguate, Alfred Belande ug  Melvin Divinagracia.

Ang makampiyon sa La Fortuna Cup modawat og P15 mil nga ganting salapi, samtang ang runner-up makadawat og P10 mil ug ang third placer mobulsa og P5 mil. 

Ang La Fortuna Cup gipaluyohan sa La Fortuna Bakery, Hotel Fortuna, Pepsi Cola ug Nature’s Spring.