Election  sa Doce Pares ipahigayon  karong adlawa

Sa wala’y bisan gamay nga pagduda, gipaabot nga usab nga pilion sa iyang ika-20 nga termino ang 88-anyos nga eskrima Grandmaster nga si Ciriaco 'Cacoy' Cañete isip   presidente sa Cacoy Doce Pares World Federation karong adlawa anha sa ilang headquarters sa dalan C. Padilla, ning dakbayan.

Si Cañete napiling presidente sa Doce Pares sukad pa niadtong tuig 1988 dihang namatay ang iyang maguwang nga si Eulogio 'Yoling' Cañete, kinsa maoy nahimong “president for life” sa Doce Pares ug dili halayo nga mao usab kini ang dangatan ni Cacoy.

Sugdan ang piniliay sa alas 6:30 sa gabii ug human sa pagsanong sa mga miyembro aron pagpabiling kang Cacoy isip presidente, pilion usab dayon ang ubang opisyales gikan sa mga bise-presidente hangtod ngadto sa  adviser sa club.

Unya sa Enero 12 sunod tuig, pagahimuon ang induction atol usab sa ilang ika-76 nga founding anniversary nga anha gihapon ipahigayon sa ilang kota  nga pagatambongan sa mga local ug foreign nga mga bisita  nga suod kaayo ni Cacoy.

Si Cacoy ug ang iyang mga sakop sa pamilya, subsob usab nga nangandam alang sa mas daku nga kalihukan karong umaabot Marso tungod kay aduna may ituboy didto sa Hall of Fame ug ingon man adunay duha ka adlaw nga mixed martial arts seminar diha sa Holiday Plaza Hotel.