2007 Bago InVITATIONAL basketball TILT : Colonia  milangkat sa korona

Hingpit na nga naangkon sa Colonia Flaming Stars  prestihiyosong titulo sa 2007 Bago Invitational basketball tournament human maka-eskapo sa kulbahinam nga duwa batok sa ASA Dribblers sa iskor nga 73-68 niadtong Sabado sa gabii  uban sa bagang duot sa katawhan didto sa  Bago  Sports and Cultural Complex.

Naghugyaw ug nalingaw ang katawhan nga misaksi sa   duwa gumikan kay ang mga imports nga gikuha sa tagsa-tagsa ka koponan pulos man miyagyag sa ilang abilidad.

Apan ang Colonia Flaming Stars nga nikuha sa serbisyo nilang M. Lhuillier mainstay Amietroy Mercader uban nilang Rogado, Demape, Labares, Nemenzo ug Malig-on sa University of Southern Philippines Foundation (USPF) Panthers  ug  Lunday sa University of Cebu (UC) Webmasters maoy mipatigbabaw paghuman sa duwa.

Hinuon, miagi pa og kalisud ang Colonia Flaming Stars Tuburan mayor Constancio Suezo ug  barangay captain Alice Cowley wala pa maangkon ang kadaugan gumikan kay ang ilang sinaligan nga si Mercader nag-fouled out sa tunga-tungang bahin sa fourth  quarter tungod sa nahiagumang injury.

Gumikan niini, ang ASA Dribblers ni Eddie Prigo ug coach Beling Baricuatro mipahimulos sa  kahigayonan apan wala mosaler ang ilang mga paningkamot  kay gisakyan man sab sila og demalas.

Ang ASA Dribblers  igo lang nikabya og nuybe puntos batok sa Colonia Flaming Stars nga 15 puntos hinungdan sa ilang kapildihan.

Si Rogado nga mikutlo og 16 puntos maoy napiling most valuable player.

Sa laing bahin, ang Sto. Niño-Tabuelan ni Hon. Genesis Bravo  ug Hon. Rex Gerona maoy nakaangkon sa ikatulong dapit human gilubong ang Arpili Residences ni Joy Taboada sa iskor nga 97-82 niadtong Biyernes sa gabii didto gihapon sa  Bago  Sports and Cultural Complex.

Ang ace gunner sa Sto. Niño  nga si Ursal sa Bogo City maoy nangulo sa maong kadaugan nga miposte og game-high 34 puntos, gisundan ni Tagalog nga mibugha og 27 puntos, samtang si Totong Villanueva sa Arpili mibomba og 30 puntos ug gisundan ni Custodio sa iyang 24 puntos.