Gibayaw sila si Jusabelle Brillo sa Lapu-Lapu City ug guest player Arlene Maloloy-on sa Liloan isip most valuable players sa city ug sa municipal clusters sa bag-o lang natapos nga 3rd Governor Gwen Garcia Unity Volleyball Cup for Women atol sa awarding ceremony niadtong Sabado sa Cebu International Convention Center (CICC) sa dakbayan sa Mandaue.
Mao kini ang ikaduhang MVP award nga nadaog ni Brillo. Nahimo sab siya nga MVP sa unang tuig sa MVP.
Gawas sa MVP trophy, si Brillo nidaog sab isip Best Blocker alang sa city category uban ni Eimalie Basalo sa Team Liloan nga nidaog sa habig sa municipal cluster.
Sa laing bahin, si Maloloy-on nisakmit sa iyang unang MVP trophy ug ingon man Best Attacker award uban ni Chandrina Tumabang sa Lapu-Lapu City.
Gawas sa mga tropeyo nga medalya ug ganting salapi nga ilang nadaog, sila si Brillo ug Maloloy-on giaporan sab og Globe cellular phones ug sports eyewear gikan sa Bolle.
Ang Best Setter awards napunta ngadto nilang Michelle Gimarino sa City cluster ug Melanie Silvestre alang sa municipal cluster.
Sila si Janez Armie Togo sa Mandaue, ang teammate ni Brillo nga nidaog sa Nestea Beach Volleyball championship maoy Best Server alang sa city cluster ug Danalie Baquiro sa municipal cluster.
Sila si Janica Jimenez ug Reslie Pascual maoy nidaog ning tuiga sa Best Libero awards sa city ug municipal clusters.
Ang GUV Cup usa ka developmental volleyball sports program alang sa kababayen-an nga gi-organisar ni Cebu Governor Gwen Garcia ug sa Cebu Volleyball Association ubos sa liderato ni Glen Anthony Soco.