Mayor Reluya Cup mosikad ugma

Upat ka overall titles ang giandam alang sa Mayor Neneth Reluya Cup nga mosikad ugma didto sa San Fernando sa habagatang bahin sa Sugbu.

Si Glenn Aguilar, ang premiere rider sa nasud mopakita na sab sa iyang talento sa special race batok nilang Pepo Rubi, Jon-Jon Adlawan, Jubannie ug Jubenile Abellar ug uban sa 11th ug final leg sa 2007 MS Motosuit Motocross Series.

Si Jobannie Abellar nagtinguha mokadlit og double title niining tuiga. Si Jobannie nidaog sa intermediate class ug naglantaw kini sa expert class diin siya nilabaw og 270 puntos.

Gawas sa expert class, ang riders magsangka sab sa overall titles sa Executive, A, B ug open enduro.

Nag-una sa Executive A  race human sa 10 legs mao si Andot Rubi nga adunay 304 puntos, gisundan nilang Jun Enriquez  ug Aloy Igot nga mipuwesto sa ikaduha ug ikatulo nga dapit.

Si Seigfred Ornopia maoy nag-una sa Executive B sa iyang 298 puntos nga milabaw lang og 31 puntos ni Enriquez.

Sa laing bahin, si Ayen Ledesma  mao usab ang anaa sa taas nga dapit sa open enduro class nga nihipos og 298 puntos, gisundan ni Dongkie Sanchez kinsa adunay 264 puntos.

Mga riders nga nakakuha na'g titulo sa ilang tagsa-tagsa ka dibisyon mao sila si John Flores (mini class), Dongkie Sanchez (local enduro), Paulo Inoc (novice open production) ug Ayen Ledesma (beginner's open production).