Banatan na 2007 MVBA Second Conference Finals

Ang M. Lhuillier Kwarta Padala-Cebu City Jewelers mo-ataki na karong adlawa batok sa Holcim Pryce Pharma-MisOr sa Game-1 sa "best-of-three"  2007 Mindanao Visayas Basketball Association (MVBA) Second Conference Finals  sa alas 5:30 sa hapon didto sa Xavier University Gym sa dakbayan sa Cagayan de Oro.

Gawas nga maoy defending champion,  ang M. Lhuillier mao sab ang paborito sa serye gumikan kay ilang giamong-amongan  ang MisOr sa duha nila ka engkuwentro sa eliminasyon sa iskor nga 81-76 sud sa overtime niadtong Septiyembre 28 didto sa XU Gym ug 74-69 niadtong Nobiyembre 6 didto sa Cebu Coliseum.

Ang Game-2 gikatakda karong Disyembre 14  diha sa Cebu Coliseum ug kun adunay Game-3  duwaon karong Disyembre 15 diha sa Cebu Coliseum.

Masentro sa atensiyon karon  mao ang match-up sa duha ka MVP nga sila si Bruce Dacia sa M. Lhuillier ug Lowell Briones sa  MisOr.

Angayan sab nga lantawon ang panagtigi sa low-post tali sa duha ka higante nga sila si  Marlon Basco sa M. Lhuillier ug Nathaniel Cruz sa MisOr.

Gipaabot sab nga moulbo sa opensa sa tagsa-tagsa nila ka mga koponan  sila si Woodrow Enriquez, Stephen Padilla ug Ronald Capati sa M. Lhuillier ug  sila si Anton Villoria, Ramil Tagupa ug Frank Nailon sa MisOr.

Sa miaging tuig, ang M. Lhuillier ug MisOr  mao sab ang  nag-abot sa finals diin gitapos sa Jewelers ang serye nga 2-1.

Ang M. Lhuillier maoy midaog sa Game-1 didto sa balwarte sa MisOr sa iskor nga 87-75. Nibawos ang MisOr sa Game-2 sa iskor nga 96-84, apan ang Jewelers nakabangon sa  tinaktakay nga Game-3 sa iskor nga 79-71 aron pagsakmit sa kampiyonato.