Pacquiao moduwa sa Team Pacman

Masaksihan na usab sa mga Sugbuanon ang abilidad ni Pinoy boxing superstar Manny Pacquiao sa natad sa basketbol gumikan kay  moduwa kini uban sa iyang Team Pacman batok sa M. Lhuillier-backed San Carlos Boys High Alumni Basketball Association (SCBHABA) sa knockout championship sa 1st MP Cup Invitational karong adlawa diha sa University of San Carlos-Main Gym.

Ang Team Pacman ug ang SCBHABA magtigi alang sa P50,000 nga ganti sa alas 5:30 sa hapon, human sa kumbati tali sa Shell-Cebu Eastern College Alumni Basketball Association (CECABA) ug  Samsung-Punta Princesa Sports Association (PPSA)  nga mag-ilog alang sa ikatulong dapit nga gitakda sa alas-4:00 sa hapon.

Sa pasiunang duwa sa alas 2:30 sa hapon, ang Sacred Heart School-Jesuit makighamag batok sa USC-North Campus sa usa ka exhibition match tali sa nag-unang SBP teams sa Sugbu.

Ang Team Pacman mi-abante sa finals human gipalayas ang PPSA sa iskor nga  89-75, samtang ang SCBHABA miangkon og laing luna sa kampiyonato human nakaipsot batok sa mga kamot sa CECABA sa iskor nga 61-60.

Ang awarding ceremony ipahigayon dayon human sa kampiyonato.