Rogado bida sa Colonia Stars
Milansang og laing kadaugan ang Colonia Stars ubos sa liderato ni Rogado dihang ilang gidabodabohan ang Arpili Residences sa iskor nga 96-86 sa nagkainit nga aksiyon sa 2007 Barangay Bago Invitational Basketball Tournament niadtong Sabado didto sa Bago Sports and Cultural Complex.
Sama sa naandan, si Rogado mao na sab ang bida sa Colonia Star nga miariya og 27 puntos. Laing tulo ka bitoon sa Colonia ang mirehistro og double digits. Si Labares mitusak og 26 puntos, si Martel miamot og 14 puntos ug si Dotilla mitampo og 12 puntos alang sa kadaugan sa Colonia Star nilang Tuburan Mayor Constancio Suezo ug Barangay Captain Alice Cowley.
Upat usab ka players ang nakakuha og double figures sa pilderong Arpili ni Mr. Eight Pepito nga gipangulohan ni Sarangsang kinsa mipabuto og 22 puntos, gisundan ni Nancia nga adunay 20 puntos, Laurente nga midonar og 18 puntos ug L. Atamaso nga mitampo og 10 puntos.
Sa ikaduhang duwa, nakabawi ang Sto. Niño-Tabuelan human mahisugamak sa Colonia Stars, 74-71 niadtong miaging semana dihang nakalingkawas kini sa kulbahinam nga duwa batok sa ASA Cagers sa iskor nga 88-87.
Ang Sto. Niño-Tabuelan nilang Brgy. Capt. Genesis Bravo ug Hon. Rex Gerona gipangulohan ni Espina kinsa mikulit og 30 puntos, samtang ang ASA Cagers gipangulohan usab ni Tarona sa iyang 17 puntos.
Sa mga duwa sa miaging Domingo, ang Langub Little Giants nilang Hon. Winnie Rosaut ug Linbird Cayson nagsandig sa ilang "run-and-gun" nga duwa nga maoy nakahugno sa Knights Cafe ni Bombie Cuyos sa iskor nga 90-88, samtang ang Colonia Stars mipaksit na sab og daog pinaagi sa pagpukan sa ASA Cagers sa iskor nga 88-86.
Karong adlawa, lain na sab nga kulbahinam nga duwa ang masaksihan sa mga lumolupyo ug sa kasilinganang barangay sa brgy. Bago diin upat ka teams ang mag-indigay sa ilang katakus.
- Latest
- Trending
