Tabotabo unang Sugbuanon nisud sa quarterfinals

Si Vince Marc “Macmac’ Tabotabo maoy labing unang Sugbuanon nga miabante sa quarterfinal sa Penang International Age-Group Tennis Championships didto sa Penang, Malaysia kagahapon.

Sa maong duwa, si Tabotabo dili kaayo agresibo ug nipakita kakapoy sa maong resulta sa iyang upat ka oras nga biyahe gikan sa Selangor paingon sa Penang apan milampos kini pagpukan sa  duha niya ka mga kaatbang sud lang sa usa ka adlaw.

Ang lumad nga taga-Tuburan sa lalawigan sa Sugbu nga karon nagtungha sa Jose Rizal University, misugod sa iyang kampanya sa 10-under division pinaagi sa 9-2 nga kadaugan batok ni Neo Khai Keat. Nidaog sab si  Tabotabo sa iyang sangka batok ni Raahil Divyesh Doshi sa Singapore, 9-2.

Ang sunod makontra ni Tabotabo sa quarterfinals mao si Jeon Seonglo sa Korea.

Sa laing bahin, si Niño Siso, ang top seed sa boys’ 14-under category, mihagdaw sab og daog sa first round batok ni Revinthiran sa Malaysia, 6-3, 6-3. Ang mga resulta sa laing Pinoy junior netters nga naglakip nilang Sally Mae Siso, Jacob Lagman, Krissianne Kintanar ug Marian Capadocia sa Manila wala pa makuha atol sa pagsuwat niini.

Nasayran, si Sally Mae maoy no. 1 seed sa girls’ 14-under division. (Yoyo R. Abayan)